ಸಂತಸದ ಸಮಯ
ಹೆರಿಗೆ ಬೇನೆಯ ಕಳೆದು ಮಗುವ ಮುಖ ನೋಡಿ ನಕ್ಕಿಹೆನು
ಬಳಿಗೆ ಸಾರುತ ಬಂದ ನನ್ನೊಡಲ ಹೊತ್ತಿಗೆಯ ಹೊತ್ತಿಹೆನು
ಅವಿತ್ತಿದ್ದ ಭಾವಗಳ ಮುತ್ತಂಥ ಪದಗಳಲಿ ಪೋಣಿಸಿಹೆನು
ಕದ್ದು ಕುಳಿತಿದ್ದ ಯೋಚನೆಗಳ ಡೋಲು ಬಾರಿಸಿ ಎಬ್ಬಿಸಿಹೆನು
ಮದಗಜದಂತೆ ಹೆಮ್ಮರವಾಗಿ ಬೆಳೆದರೂ ಸಾಲುಗಳಲಿ ಕಟ್ಟಿ ಹಾಕಿಹೆನು
ಷಟ್ಪದಿ ವ್ಯಾಕರಣ ಕಂದ ರಗಳೆಗಳ ಹಂಗಿಲ್ಲದೆ ನೇರವಾಗಿ ಗೀಚಿಹೆನು
ಸ್ಪುರಿಸಿದ ಆನಂದ ದುಃಖ ನೋವು ನಲಿವುಗಳ ತುಂಬಿ ಕಳುಹಿಹೆನು
ಬತ್ತಿ ಹೋದ ಎಣ್ಣೆ ಮುಗಿದ ಬತ್ತಿಗೂ ಜೀವ ಕೊಟ್ಟು ಉರಿಸಿಹೆನು
ಮಲಗಿ ನಿದ್ರಿಸುತ್ತಿದ್ದ ಒಣ ಹಸಿ ನೆನಪುಗಳ ಕದ ತಟ್ಟಿಹೆನು
ಬೆಳಗಿ ಬರುವ ಸೂರ್ಯನ ಹಾಗೆ ಬೆಳಗುವಂತೆ ಪ್ರೇರೇಪಿಸಿಹೆನು
ಹೆತ್ತು, ಮುತ್ತು ತುತ್ತು ಕೊಟ್ಟು ಕಾವ್ಯ ಕಂದನ ಬೆಳೆಸಿಹೆನು
ಹತ್ತಿರ ಹತ್ತಿರ ಹತ್ತೂರ ಸದಾ ಸುತ್ತಿ ಬರಲು ಕಳಿಸಿಹೆನು
ಹೆತ್ತೊಡಲ ನೋಯಿಸದು ಕತ್ತ ಹಿಚುಕಿ ಸಾಯಿಸದು
ಮೆತ್ತಿ ಬಹುಮಾನದ ಮಳೆಯ ಹೆಸರ ಬೆಳೆಸಿ ಸಾಕುವುದು .
@ಪ್ರೇಮ್@
25.12.2021
