ಹಾಸ್ಯ ಕವನ

ಕೋಪ

ಗುಂಡಗೂ ನಂಜಿಗೂ ಕೋಪ

ಕಾರಣ ಏಕೋ ಭೂಪ

ನಂಜಿಗೆ ಬೇಕು ಚಿನ್ನದ ಸರ

ಗುಂಡನು ಕೊಟ್ಟ ಕಾಸಿನ ಸರ

ಬಹಳ ದಿನಗಳ ಬಳಿಕ ತಿಳಿಯಿತು

ಅದು ಒಂದು ಗ್ರಾಮಿನ ಸರ

ಪಕ್ಕದ ಮನೆಯ ನರಸಮ್ಮನಿಂದ

ಅವಳ ಬಳಿಯೂ ಅದೇ ಸರ!

ನಂಜಿಯ ಕೋಪಕೆ ಮಿತಿ ಇಲ್ಲ

ಗುಂಡನ ನಗುವಿಗೆ ಸಾಟಿ ಇಲ್ಲ

ಮಡದಿಯ ಮಂಗ ಮಾಡಿಹನು

ಹಣವನು ಉಳಿಸಿ ಮೆರೆದಿಹನು 

ನಂಜಿಯ ಕೋಪದ ಹೊಳೆ ಉಕ್ಕಿತ್ತು

ಲಟ್ಟಣಿಗೆಯೊಂದು ಕೈಗೆ ಸಿಕ್ಕಿತ್ತು

ಗುಂಡನು ಬರಲು ಸಮಯವು ಇತ್ತು

 ಕೋಪದಿ ನಂಜಿ ಮನ ಬುಸುಗುಡುತಿತ್ತು

ಗುಂಡನು ಮನೆಗೆ ಖುಷಿಯಲಿ ಬರಲು

ಕೋಪವು ನೆಗೆದು ಚಿಮ್ಮುತ ಉಕ್ಕಲು

ಕೈಯಲ್ಲೊಂದು ತಿಂಡಿಯ ಕವರು

ಓಡುತ ಪರಿಮಳ ಮೂಗಿಗೆ ಬರಲು

ಕೋಪವ ಮುಂದೂಡಿ ಇಟ್ಟಾಯ್ತು

ಚಕ್ಕುಲಿ ತಿನ್ನುವ ಮನಸಾಯ್ತು

ಕೋಪವು ಕರಗಿ ನೀರಾಯ್ತು

ಅವಲಕ್ಕಿ ಸರವೇ ಪಾಲಾಯ್ತು

@ಹನಿ ಬಿಂದು@

02.04.2024