ನಮ್ಮ ಬಾಸೆ

ನಮ ಕನ್ನಡ ಬಾಸೆಗ್ಲಾ ದಾಯೆ ಜಾಗೆ ಕೊರೊಡು?

ತುಲುವೆರಾಯಿನ ನಮ ತುಳುನಾಡ್ ದ ಉದಯ ಆಯಿನ ಪರ್ಬ ಮಲ್ತ್ಂಡ ಯಾವಂದ? ಕನ್ನಡೊದ ರಾಜ್ಯೋತ್ಸವೊದ ಉಚ್ಚಯ ನಮ ದಾಯೆ ಮಲ್ಪೊಡು ಪನ್ಪಿನ ಪ್ರಶ್ನೆ ನಮಕ್ ಮಾತೆರೆಗ್ಲಾ ಬರ್ಪಿನವು ಸಾಜ. ತುಳುನಾಡ್‌ಡ್ ಇಪ್ಪುನ ನಮ ಪೂರ ತುಳು ಅಪ್ಪೆನ ಮಟ್ಟೆಲ್ದ ಜೋಕುಲು ಸರಿ. ಆಂಡ ನಮ್ಮ ತುಳು ಅಪ್ಪೆ ಉಂತುದಿನಿ ನಮ್ಮ ಕರ್ನಾಟಕ ರಾಜ್ಯೊಡು ಆತೆ?

" ಜೈ ಭಾರತ ಜನನಿಯ ತನುಜಾತೆ ಜಯ ಹೇ ಕರ್ನಾಟಕ ಮಾತೆ" ಪಂದ್ ಕುವೆಂಪು ಅಪ್ಪೆ ಮಗಲೆನ್ ಪುಗಾರಿ ಲೆಕ್ಕ, ಕನ್ನಡ ಅಪ್ಪೆನ ಒಂಜಿ ಮಗಲ್ ಅತ್ತ್‌ಂಡಲ ಸಗೆ ಸಂಗಡಿ ಲೆಕ್ಕ ನಮ್ಮ ತುಳು ಅಪ್ಪೆ. ಅಂಚ ಇಪ್ಪುನಗ ತುಳುಕ್ಕುಲ್ಲಾ ಕನ್ನಡದ ಲೆಕ್ಕೊನೆ ಸಾರ ಸಾರ ಒರ್ಸೊದ ಪಿರಪತ್ ಉಂಡುಗೆ. ಇಲ್ಲಡ್ ನಮ ಅಪ್ಪೆ ಬಾಸೆ ತುಳುನು ಅಮ್ಮಡ ಕಲ್ತ. ಆಂಡಲ ನಮ ಸಾಲೆಗ್ ಪೋದು ನಮ್ಮ ಅಲೋಚನೆಲೆನ್ ಬರೆಯರೆ ಬೊಕ್ಕ ಬೇತೆಕ್ಲೆನ ಯೋಚನೆಲೆನ್, ನಂಬೊಲಿಗೆನ್ ಓದರೆ ಸುರುಟ್ಟು ಕಲ್ದಿನಿ ಕನ್ನಡ ಬಾಸೆಡ್. ಅಂಚ ಇಪ್ಪುನಗ ನಮ ತುಳುನಾಡ್‌ಡ್ ಪುಟ್ಟುದು ಬುಲೆಯಿನಕುಲೇ ಆಂಡಲಾ ಈ ಕರುನಾಡ್‌ಗ್ ಸೇರ್ದಿನ ಕಾರನೊಡು ನಮ ಕನ್ನಡಮ್ಮನ ನೀರ್‌ಲಾ ಪರೊಂದು ಉಲ್ಲ. ಅಂಚ ಆನಗ ನಮ್ಮ ರಗುತೊಡುಲಾ ಕನ್ನಡದ ಕಮ್ಮೆನೆ ತುಲುಡ್ದು ಬೊಕ್ಕ ಕಂಡಿತ ಬರ್ಪುಂಡೆ. ಅಂಚಾದ್ ನಮ ಪೂರ ಒಟ್ಟು ಸೇರ್ದ್ ಕನ್ನಡ ರಾಜ್ಯೊತ್ಸವೊನ್ಲಾ ಆಚರ್ನೆ ಮಲ್ಪುನವು ನಮ್ಮ ದರ್ಮ ಆತೇ?

ಪ್ರತಿ ಇಂಗ್ಲಿಸ್ ಒರ್ಸೊದ ನವೆಂಬರ್ ತಿಂಗೊಲ್ದ ಸುರುತ್ತ ದಿನತ್ತಾನಿ ಇಡೀ ಕರುನಾಡು ಅತ್‌ಂಡ ಕರ್ನಾಟಕ ರಾಜ್ಯೊದ ಜನಕ್ಕುಲಾಯಿನ ನಮ ಕನ್ನಡ ರಾಜ್ಯೊ ಆಯಿನ ಕುಸಿಕ್ ಅವೆನ್ ಪರ್ಬೊದ ಲೆಕ್ಕ ಆಚರ್ನೆ ಮಲ್ಪುವ. ಕನ್ನಡ ಬಾಸೆ, ಪಿರಾಕ್ ದ ಕಟ್ಟ್‌ಲು, ಆಚರ್ನೆಲು ಪೂರ ಒರಿಯರೆ ಬೋಡಾದ್, ನಮ್ಮ ಜೋಕುಲು ಅವೆನ್ ತೂದು ನನ ಅಕುಲ್ಲಾ ಅವೆನ್ ದುಂಬುಗು ನಡಪಾವೊಂದು ಪೋಯರೆ ಆವು ಬೋಡು. ಪರ ಊರುಗು ಪೋಯಿನಲ್ಪ ತುಳು, ಕನ್ನಡದಕ್ಲು ಒಟ್ಟಾದ್ ನಮ ಕರ್ನಾಟಕದಕುಲು ಪನ್ಪಿನ ಕುಸಿಟ್ಟೆ ದಿನ ದೆಪ್ಪುವೆರ್.ಗಟ್ಟದ ಮಿತ್ತ್ ಏರಾಂಡಲಾ ನಮ ಪೋಂಡ ಆತ್‌ಂಡ ಅಲ್ಪದಕುಲು ಇಡೆ ಬತ್ ಬ್ಯಾರ ಮಲ್ಪೊಡಾಂಡ ನಮಕ್ ಅಕ್ಲೆಡ ಪಾತೆರ್ಯರೆ ಸಾಯಗ್ ಬರ್‌ಪಿನಿ ಕನ್ನಡೊನೆ ಆತೆ?

ಕನ್ನಡ ನಾಡ್ ಪಂದ್ ಪಟ್ಟ್‌ನಗ ತುಳುತ ನಮ್ಮ ಜಾಗೆನ್ಲಾ ಹಿರಿಯಕ್ಲು ಕರ್ನಾಟಕೊದೊಟ್ಟಿಗೆ ಪಾಡಿಯೆರ್. ಅಕುಲು ಮಿನಿ ನಮನ್ ಕೇರಲೊದ ಒಟ್ಟುಗು ಪಾಡ್ದುಂಡ ನಮ ಮಾತ ಇನಿ ಮಲಿಯಾಲಿ ಕಲ್ಪೊಡಿತ್ಂಡ್. ಅಂಚಾದ್ ಪರ ರಾಜ್ಯೊಗು ಪೋಯಿನಪಗ ನಮ ಕರ್ನಾಟಕಡ್ ಪುಟ್ಟಿ ಬಲತಿನ ಜೋಕುಲು ಪನ್ಪ. ಪರ ದೇಸೊಗು ಪೋಯಿನಪಗ ನಮ ಇಂಡಿಯಾದಕ್ಲು ಪಂದ್ ಪನ್ಪ. ಅಡೆಗ್ ನಮಕ್ ಮೂಜಿ ಅಪ್ಪೆಡಿಕುಲು. ಪೆದಿ ಅಪ್ಪೆಲಾ ಸೇರ್ಂಡ ನಾಲ್ ಜನ. ಅಜ್ಜಿನ್ಲಾ ಪತ್ಂಡ ಐನ್ ಜನ. ಭಾರತ ನಮ್ಮ ಅಜ್ಜಿ ಆಂಡ ಕನ್ನಡ ನಮ್ಮ ಮಲ್ಲಮ್ಮ, ತುಲುವಲ್ಪೆ ನಮ್ಮಪ್ಪೆ. ನೇಲ್ಯಪ್ಪೆನ್ಲಾ ನಮ ಓಲ್ಲ ಬುಡ್ದು ಕೊರ್ಪುಜ ಅತೆ? ಆರ್ಲಾ ನಮ್ಮಾರೆ... ನಮಲಾ ಅರೆನ ಜೋಕುಲೆ..ಅಂಚಾದ್ ನಮ ರಾಜ್ಯೊತ್ಸವೊದ ಆಚರ್ನೆಗ್ಲಾ
ಒಟ್ಟು ಸೇರೊಂದು ಗಾಂಡ್ ಗೌಜಿಡ್ ಮಲ್ಪೊಡು.

ನಂದಲಿಕೆದ ಕವಿ ಪಿರಾಕ್‌ದ ಲಕ್ಶ್ಮೀಸೆರ್ಲಾ ತುಲುನಾಡ್ದಾರೆ ಆಂಡಲಾ ಆರ್ ಬರೆಯಿನ ಸಾಯಿತ್ಯೊಲು ಪೂರಾ ಕನ್ನಡೊಡು ಉಂಡುಗೆ. ತುಳುನಾಡ್‌ದ ನಮ್ಮ ಕಲಾವಿದೆರ್‌ಲಾ, ಮಸ್ತ್ ಜನೊಕ್ಲೆಗ್ ನಮ ಮುಟ್ಟೊಡು ಪನ್ಪಿನ ಕಾರನೊಗು ಕನ್ನಡ, ತೆಲುಗು, ತಮಿಲುದಂಚಿ ಮೋನೆ ಪಾಡೊಂದು ಉಲ್ಲೆರ್. ಬೇಲೆಗಾದ್ ಪರ ಊರುಗು ಪೋದು ಬದುಕುನ ನಮ್ಮ ತುಳುವೆರ್ ಅಪ್ಪೆ ಬಾಸೆನ್ ಮರತ್ ಆ ಊರುದ ಬಾಸೆಲೆನೆ ಅಕ್ಲೆನ ಜೋಕುಲೆಗ್ ಕಲ್ಪಾವೊಂದು ಉಲ್ಲೆರ್.

ಆವು ಏತೋ ಜನಕ್ ತುಳು ಪಾತೆರುನಿ ಪಂಡ ಯಾನ್ ಎಲ್ಯ ಆಪೆ ಪನ್ಪಿನ ಬೇಜಾರ್ ಉಂಡು. ಅಂಚ ಅಕುಲು ಅಕ್ಲೆನ ಜೋಕ್ಲೆಡ ಕನ್ನಡೊಡೆ ಪಾತೆರುವೆರ್. ಅಡೆಗ್ ಒಂಜಿ ಜನಾಂಗೊದ ತುಳು ದುಂಬು ಪೋವಂದೆ ಬಾಸೆ ಅಕ್ಲೆನ ಕುಟುಮೊಡು ಅಲ್ಪೊನೆ ಸೈತ್ ಪೋಪುಂಡು. ಅಂಚ ಆಯರೆ ಅವ್‌ಕಾಸ ಕೊರಂದೆ ನಮ್ಮ ಬಾಸೆಲೆನ್ ನಮ ಗಳಸೊಂದು, ಒರಿಪವೊಂದು ಪೋಪಿನ ಮಾಮಲ್ಲ ಜಬದಾರಿ ನಮ್ಮ ಪೂರ ಜನೊತ್ತ ಪುಗೆಲ್ಡ್ ಉಂಡು. ಸರಿ ಅತ್ತೆ? ಐತ ಒಟ್ಟುಗು ಕನ್ನಡೊನು ಒರಿಪಾಯರೆಗ್ಲಾ ನಮ ನಮ್ಮ ಕೈಟ್ ಆಯಿನ ಸಾಯ ಮಲ್ತೊಂದು, ಬರೆಯೊಂದು, ಓದೊಂದು, ನಮ್ಮ ಲಿಪಿ ನಮಾತೆಗೆ ಕಲ್ತೊಂದು ಬತ್‌ಂಡ ಎಲ್ಯ ಪಿರಾಕ್ ದ ನಮ್ಮ ಪಾತೆರ ಮರಪಂದೆ ಪೋವು. ಇಜ್ಜಿಡ ಬೇತೆ ಕೆಲವು ಬಾಸೆದ ಲೆಕ್ಕ ಸಯಿತ್ ಪೋವು ಮಾರ್ರೆ... ನನ ಬಾಸೆಲೆನ್ ಒರಿಪುನ ಬೊಕ್ಕ ಗಲಸುನ ಮಾತ್ರ ನಮ್ಮ ಜಬದಾರಿ . ಅವೆನ್ ದುಂಬುದ ಜನಕುಲೆ ಎದುರು ಕೊನೊದು ದೀಪುನಿ. ಬೊಕ್ಕ ದುಂಬೊತ್ತ ತರೆ ಕೊರೊಡಾಯಿನಿ ನಮ್ಮ ಜೋಕುಲು , ಅಕುಲು ಅಕ್ಲೆನ ಕಾಲೊಡು. ಅಪಗ ಪೂರಾ ಲೋಕ ಇಂಗ್ಲಿಸ್‌ಮಯ ಆಪುಂಡು.‌ ದಾಯೆ ಪನ್ನಗ ನಮ್ಮ ಜೋಕುಲು ಕಲ್ಪುನಿ ಅವೆನೆ ಅತೇ?

ತುಳು ಆವಡ್ ಕನ್ನಡ ಆವಡ್, ಒರಿಯೊಡು. ಪರ್ಬ ಉಚ್ಚಯೊಗು ಮಾತ್ರ ಆತ್, ನಿಚ್ಚ ಗಲಸುನ ಬದ್ಕ್‌ದ ಬಾಸೆ ಆದ್ ಅವು ಒರಿಯೊಡು. ಬ್ಯಾರೊಗಾದ್ ನಮ್ಮ ದೇಸೊಗು ಬತ್ತಿನ ಇಂಗ್ಲಿಸ್‌ದಕ್ಲೆನ್ ತೂಲೆಗೆ. ಸಾಲೆ ಓಪನ್ ಮಲ್ತ್‌ದ್ ಏತ್ ಸೋಕುಡೆ ಅಕ್ಲೆನ ಬಾಸೆನ್ ಮಾತೆರ್ಲಾ ಕಲ್ಪುಲೆಕ್ಕ ಮಲ್ತೆರ್! ಆತೆ ಅತ್.... ಒರಿಪಾದ್‌ಲಾ ಪೋತೆರ್. ಇತ್ತೆ ನಮಕ್ ನಮ್ಮ ಅಪ್ಪೆ ಬಾಸೆಡ್ದ್ ಸೋಕು ಇಂಗ್ಲಿಸ್ ಬರ್ಪುಂಡು. ಅಂಚೆನೆ ನಮ್ಮ ಬಾಸೆನ್ಲಾ ಪೂರೆರೆಗ್ ಪಟ್ಟೊಡು. ಕನ್ನಡ ಆವಡ್ ತುಳು ಆವಡ್, ಪರ್ಬ ಮಲ್ತ್ ಬಾಸೆದ ಬುಲೆಚ್ಚಿಲ್‌ಗ್ ನಮ ಪೂರ ಒಂಜಾವೊಡು. ನಿಕುಲು ದಾದ ಪನ್ಪರ್?
@ಹನಿಬಿಂದು@