ಬಾಳು ಬೆಳಗಲಿ

ಬಾಳು ಬಂಗಾರವಾಗಿರಲಿ

ಬಂಗಾರದಂತಹ ಬದುಕ  ಧಾರೆ ಎರೆದಿರುವೆ

ಬಂಧನವಾಗದ ಹಾಗೆ ಪೊರೆಯುವಂತಾಗಲಿ 

ಭೃಂಗದ ಹಾಗಿದ್ದೆ ಅತ್ತಿತ್ತ ಓಡಾಡುತ್ತಾ ಆರಾಮದಲಿ

ಭಯವಿಲ್ಲದ ಬಾಳ ಕಟ್ಟಿ ಕೊಡುವಂತಾಗಲಿ 

ಭೋಗ ಭಾಗ್ಯದ ಅತಿಯಾಸೆ ಎನಗಿಲ್ಲ

ಭವ್ಯ ಭವಿತವ್ಯವ ರೂಪಿಸುವ ಕನಸು ನನಸಾಗಲಿ

ಬೆಳ್ಳಿ ಬಂಗಾರದ ಧನದ ದುರಾಸೆ ಇಲ್ಲಿಲ್ಲ

ಬೆವರ ಹರಿಸಿ ದುಡಿದ ಬಾಳು ಬೆಳಗಲಿ

ಬಿಚ್ಚು ಮನಸಿನಲಿ ಮುನಿಸು ಬಾರದಿರಲಿ

ದೇವನೊಲುಮೆಯು ಸದಾ ಜೊತೆಗಿರಲಿ

ಅದೃಷ್ಟ ಅದೃಶ್ಯ ಶಕ್ತಿಯಾಗಿ ಬರುತಿರಲಿ

ಅರಗಿನ ಮನೆಯಾದರೂ ಖುಷಿಯು ಅರಳಲಿ

ದೇವರ ವರ ಪ್ರಸಾದ ನಿತ್ಯ ಜೊತೆಗಿರಲಿ

ಮನ ಮಂದಿರದಲಿ ಜ್ಯೋತಿ ಬೆಳಗುತಿರಲಿ 

ಸ್ನೇಹ ಪ್ರೇಮದ ಕಡಲುಕ್ಕಿ ಹರಿಯಲಿ

ಬಿಳಿಯ ತೆರೆಗಳು ಕಷ್ಟಗಳ ದೂರಾಗಿಸಲಿ

ಮಮತೆ ಸಾಂತ್ವನ ಝರಿಯಾಗಿ ಉಕ್ಕಲಿ

ಮಾನವತೆಯ ಹಾದಿಯಲಿ ಸಾಗುವಂತಾಗಲಿ

ಬೇರೆಂಬ ಭೇದವಿಲ್ಲದೆ ಒಂದಾಗಿ ಸಾಗುತಲಿ

ಬದುಕ ಬೇರಿನ ರಸ ಸವಿಯುವಂತಾಗಲಿ

ಬೇನೆ ಬೇಸರ ಕಳೆದು ಹೋಗಲಿ

ಬುವಿಯ ಸುಖವು ಬಳಿಗೆ ಬರಲಿ

ಬೇವು ಬೆಲ್ಲದ ಬದುಕಿನೊಳಗೆ

ಬೆರೆತು ಬಾಳುವ ಭಾಷೆ ಉಳಿಯಲಿ

@ಹನಿಬಿಂದು@

04.04.2024