ಮೋನೆ

ಮೋನೆ

ಮೋನೆ ಅತ್ ಅವು 

ಬೊಕ್ಕ ದಾದ!

ಅವು ಮುಸುಂಟು 

ಅವು ದಾಯೆ

ದಾಯೆ ಪಂಡ 

ಐಟ್ಟಿಜ್ಜಿ ಚೂರ್ಲಾ

ತೆಲಿಕೆದ ಪೂ..

@ಹನಿಬಿಂದು@

07.06.2026

ಜೈ ತುಳುವಪ್ಪೆ

ತುಲು ಬೆಲಗಡ್ 

ಜೈ ತುಲುನಾಡ್ ಏಪಲಾ ಜೈ ತುಲುವಪ್ಪೆ

ಜೋಕುಲು ಮಾನವ ಬಾಸೆ ಒರಿಯಡಪ್ಪೆ//

ಮಾನಾದಿಗೆ ತಿಕ್ಯರೆ ಮದಪ್ಪಂದೆ ಪಾತೆರೊಡು

ಸಾನದಿಗೆ ಬೆಲಗ್‌ದ್ ಬಗ್ ತ್ತಿಡ್ ಅಡ್ಡ ಬೂರೊಡು

ಉರೂರುಗು ತುಲು ಬಾಸೆದ ಪದೊಕ್ಕುಲು ಬಲಿಪ್ಪೊಡು

ಪರ ಊರುಡ್ದು ಬತ್ತಿನಕುಲು ನಮ್ಮ ಬಾಸೆ ಗಲಸೊಡು//

ಇರಿಯಕ್ಲೆ ಆಟಿದ ತಿನಸ್ ತಿನೊಡು 

ನಮ್ಮ ಜೋಕ್ಲೆಗ್ಲಾ  ಐತ ರುಚಿ ತೆರಿಯೊಡು

ಅಪ್ಪೆ ಬೇರ್ ನಮಕ್ ಒರಿಯೊಡು

ಊರು ಬಾಸೆ ಕಟ್ಟುಲು ಬೆಲಗೊಡು//

ಮೋನೆ ತೂನಗ ತೆಲಿಕೆ ಉರ್ಕಡ್

ಒಟ್ಟು ಸೇರ್ನಗ ಬಾಸೆ ಒಂಜಾವಡ್

ಬೇಲೆ ಬೆನ್ನಗ ಕೈಕುಲು ಜೋಡ್ಯಡ್ 

ಅಪ್ಪೆ ಪುದರ್ ಬನ್ನಗ   ಉಸುಲು ಒಂಜಾವಡ್//

@ಹನಿಬಿಂದು@

08.08.2026

ಮೋನೆ

ಮೋನೆ

ಮೋನೆ ಅತ್ ಅವು 

ಬೊಕ್ಕ ದಾದ!

ಅವು ಮುಸುಂಟು 

ಅವು ದಾಯೆ

ದಾಯೆ ಪಂಡ 

ಐಟ್ಟಿಜ್ಜಿ ಚೂರ್ಲಾ

ತೆಲಿಕೆದ ಪೂ..

@ಹನಿಬಿಂದು@

07.06.2026

ಚಿಟ್ಕಾ

ಚಿಟ್ಕಾ

ಪೊರ್ಲು

ಮೋಲು ತೂಯರೆ ಬಾರಿ ಪೊರ್ಲು

ಅವ್ವೇ ಎನ್ನ ಉಡಲ್‌ಗ್ ಮಲ್ಲ ಉರ್ಲು

ಆನುಲು ಕನ್ನ್ ಪಾಡುವೆರ್ ಮಾತ ಸರಿ

ಪೊನ್ನುಲ್ಲಾ ಬೋಲೆ ಕನ್ನ್ ಪೂಂಕ ದೀದ್ ತೂಪೆರ್ ಕಿರಿಕ್ಕಿರಿ... 

@ಹನಿಬಿಂದು@

28.07.2026

ಭಾರತಿ ಅಪ್ಪೆ

ಭಾರತಿ ಅಪ್ಪೆ, ಈರೇ ಎಂಕ್ಲೆ ಜೀವೊದ ದೀಪ.

ಪೊನ್ನ ಮನ್ನ್ ದ ಪರಿಮಲ ಉಂದು ಇರೆ ರೂಪ.

 ಇರೆನ  ತುದೆಕುಲು ಕುಸಿತ್ತ ರಾಗೊನು ಪನ್ಪತ್ತೆ

 ಮಾಮಲ್ಲ ಗುಡ್ಡೆಲು ನಂಬೊಲಿಕೆದ ರೂಪೊಡು  ಉಂತುದತ್ತೆ//

 ಪಚ್ಚೆ  ಪಜಿರಲು ಮೂಮಲ್ಲ ಕನೊಕುಲೆ ಬಿತ್ತುನವು

 ಬೀಜುನ ಗಾಲಿ ಕಮ್ಮೆನೆ ಗಂದೊನು ಬೀರುನವು

 ಮುಲ್ತ ಸಂಸ್ಕೃತಿ ಲೋಕೊಗ್  ಬೊಲ್ಪುನು ಕೊರ್ಪಿನವು

 ಜನೊಕ್ಲೆ ಬಾಸೆ ತೀಪೆದ ಅಮೃತ ಪಸರುನ •

ಶೂರೆರೆ ತ್ಯಾಗ ಇರೆನ ಕಿರೀಟದ ಬೊಲ್ಲಿಯೇ

 ಮುನಿಕ್ಲೆ ಜ್ಞಾನ ಇರೆನ ಕೀರ್ತಿದ ತುಡರ್ ಯೇ

ಐಕ್ಯತೆ ಪನ್ಪಿನ ಇರೆನ ಶೋಕದ ಮಾಲೆಯೆ.

ಶಾಂತಿದ ಪೂಕ್ಕುಲು ಇರೆನ ಮಟ್ಟಲ್ಡ್ ಅರಲುವಯೇ

 ಇರೆನ  ಸೇವೆನ್ ಮಲ್ಪುನ ಎಂಕ್ಲೆನ  ಭಾಗ್ಯಯೇ

 ಇರೆನ  ಪರ್ಮೆ ಅವು  ಬಾನದ  ಬೊಲ್ಲಿಡ್  ಮಿನ್ಕುನಯೇ.

"ಜೈ ಭಾರತ" ಪನ್ಪಿನ ನಮ್ಮ  ಉಡಲ್ ದ ನಾದಯೇ

ಭಾರತಿ ಅಪ್ಪೆ, ಇರೆ ವರೊನೇ  ನಮ್ಮ  ನಿಚ್ಚ ಕಾಪುಯೇ//

@ಹನಿಬಿಂದು@

27.06.2026

ಯೋಗ ಮಲ್ಪುಗ

ಯೋಗ ಮಲ್ಪುಗ

ಯೋಗ ಮಲ್ತ್ಂಡ ರೋಗ ಇಜ್ಜಿಗೆ

ಪೂರ ಪಡೆಯೆರೆ ಯೋಗ ಬೋಡುಗೆ 

ಭೋಗ ಭಾಗ್ಯಗ್ ಬರವು ಯೋಗ್ಯಗೆ 

ನಾಗ ದೇವೆರೆ ಊರು ನಮ್ಮಗೆ

ಆರೋಗ್ಯ ಇಪ್ಪಡ್ ಸರ್ವ ಕಾಲೊಡು

ತೆಲಿಕೆ ದಿಂಜಿದ್ ಬರಡ್ ಮೋನೆಡ್

ಉಲ್ಲಾಸ ತೋಜಿದ್ ಬದ್‌ಕ್ ನಡಪಡ್ 

ರೋಗ ದಾಂತೆ ದಿನೊಲ ಸಾಗಡ್ 

ಯೋಗ ಪ್ರಾನಾಯಾಮ ದ್ಯಾನ ಮಲ್ಪುಗ

ರೋಗ ಬರಂದಿಲೆಕ್ಕ ನಮ ಪೂರ ಬಾಲ್‌ಗ

ಜಾಗೆ ಬೊರ್ಚಿ ಆಸ್ಪತ್ರೆಡ್ ನಮ್ಮಕ್ಲೆಗ್

ಎಡ್ಡೆ ಉಸುಲುನು ಇಲ್ಲಲೆ ದೆತೊನುಗ 

@ಹನಿಬಿಂದು@

23.06.2026

ಆಯೆ ಮಲ್ಲ ಜನ

ಆಯೆ ಮಲ್ಲ ಜನ

ಆವು ತೂಯರೆ ಮಲ್ಲ ಕಾಸ್‌ದ ಜನ 

ತಿರ್ಗೆರೆ ಕಾರುಂಡು ಮಲ್ಲ ಕಟ್ವನದ ಇಲ್ಲುಂಡು

ಒಟ್ಟಿಗೆ ಬಾರಿ ಜನಕ್ಲೆನ ಗ್ಯಾಂಗುಂಡು

ಏಪಲಾ ಪಾರ್ಟಿಡ್ ತಿನ್ಪಿನ ಸುತ್ತುನ ಬೇಲೆ ಉಂಡು

ಆಂಡ ದಾನೆ, ನರಮಾನಿನ ಗುನ ಬೋಡೆ 

ನಾಲ್ ಜನಕ್ ಸಾಯ ಆಪಿನ ಮನಸ್ ಬರೊಡೆ

ಪಾಪದಾಯನ ಮಿತ್ ಒಂತೆ ಕರ್ನೆ ಇಪ್ಪೊಡೆ

ತನ್ನ ಒಟ್ಟುಗು ಇತ್ತಿನಕ್ಲೆಗಾಂಡಲ ಒಂತೆ ಸಾಯ ಮಲ್ಪೊಡೆ

ಪಾಪದಾಯನ ಬಂಙೊಗು ಕೈ ಕೊರ್ದು ಉಂತೊಡೆ

ತನ್ಕ್ ಬೋಡಿನ ದೆತೊಂದು ದಕ್ಕುನತ ಕಡೆಕ್

ಮಲ್ಲಾಯನ ದೋಸ್ತಿ ಮಲ್ಪಡೆ

ಬಡವನ ಕಷ್ಟೊನು ಮರಪಡೆ

ಸಾಯ ಬೋಡು ಪಂದ್ ಇತ್ತಿನಾಯಗ್ ಆ ಸಮಯೊಡು ಕೈ ಬುದಡೆ

ಆವು ಏಪಲ ನೆಂಪು ದೀವೊಡೆ

ಆಯೆ ಯೇತ್ ಮಲ್ಲಾಯೆ ಆಂಡ ದಾನೆ

ಬೆರಿ ಸಾಯ ಉಂತುನ ಗುನ ಇಜ್ಜಿಡ

ಒರಿಯಾಗೊರಿ ಬೋಡಾಯಿನ ಪೊರ್ತುಗು ಆಯಿಜೆಡ 

ನರಮಾಣಿನ ರಗ್‌ತೊದ ಗುನ ಬತ್ತಿಜಿಡ 

ಪುಟ್ಟಿ ಬೊಕ್ಕ ನಾಲ್ ಜನಕ್ ಆಯಿಜಿಡ 

@ಹನಿಬಿಂದು@

06.06.2026

ಮರ್ಮಲ್

ಮರ್ಮಲ್

ಪೊಸತ್ ಬತ್ತಿನ ಮರ್ಮಲ್ ಕೇಂಡಲ್ 

ಮಾಮಿಯೆ ಎನ್ನ ಜಾಗೆ ಓಲು 

ಕಂಡನಿ ಬೊಡೆದಿ ಪೊಸ ಮದ್ಮಯೆ ಮದಿಮಲ್

ಕುಲ್ಲೆರೆ ಕುಸಿಟ್ಟ್ ಓಲಾವು?

ಮಾಮಿಗ್ ಬತ್ತ್ಂಡ್ ಮಾಮಲ್ಲ ಕೋಪ

ಕುಸಿಟ್ ಕುಲ್ಲೆರೆ ಬೈದಲ್ ಇಡೆ

ಬೆನ್ನಿದ ಬೇಲೆ ಕಾತ್‌ದ್ ಕುಲ್ದುಂಡು

ಕುಲ್ಲುನ ಕಾಲ ಮುಗಿದಾಂಡ್

ಕೋಪೊಡೆ ಪಂಡಲ್ ಮಾಮಿ ಅಲೆಗ್

ಪಿರವುಡು ಬೈಪನೆ ಉಂಡತ್ತ

ಪೋದು ಕುಲ್ಲುಲೆ ಕಾಂಡೆಡ್ದ್ ಬಯ್ಯಗ್

ಬೈ ಪಾಡಿ ನೀರ್ ಪಾಡಿ ಬೊರಿದ್ ಬುಡಿ

ಉತ್ತರ ಬತ್ತಿನ ಗೊತ್ತಾಂದಿ ಮದಿಮಲ್

ಬೈಪನೆ ತೂತಿನ ಪೊಣ್ಣತ್ತ್ 

ಬೈಪನೆ ಪಂಡ ಪೊಸತೊಂಜಿ ಕೋನೆ 

ಪಂದಾಲ್ ಎನ್ಯಲ್ ಕುಸಿ ಪಡೆದ್

ಕಂಡನಿ ಬನ್ನಗ ಸುರುಕ್ಕು ಪಂಡಲ್

ಬೈಪನೆ ಓಲು ನಿಕಲ್ನಲ್ಪ

ದೀಯರೆ ಬೋಡು ಎನ್ನ ಪೊಸ ಕುಂಟು

ತೋಜವರ  ಎಂಕ್ ಅವೆನೊರ ಮುಲ್ಪ

ದಾದಂದ್ ಅರ್ತನೆ ಆವಂದಿ ಕಂಡನಿ 

ಕನ್ನ್ ಬಾಯಿ ಬಾಯಿ ಬುಡ್ದು ತೂಯೆ

ಬೈಪನೆ ದಾಯೆಗ್ ಮೋಕೆದ ಬೊಡೆದಿ

ಇಲ್ಲದ ಉಲಯೆ ದೀವೊಲ್ಯತ್ತ..

ಇತ್ತೆ ಕನ್ನ್  ಕನ್ನ್ ಬಾಯಿ ಬಾಯಿ 

ಬುಡ್ಪಿನ ಬೇಲೆ ಮರ್ಮಲ್ನ

ಅಡೆಗೆ ಬತ್ತಿನ ಮಾಮಿ ಕೇಂದ್

ಮಾಮುಡ ಪಂದ್ ತೆಲ್ತೆರ್ಗೆ..

@ಹನಿಬಿಂದು@

05.06.2026

ಒರ ಪಿರ ತೂನಗ

ಪಿರ ಒರ ತೂನಗ

ಅಪಗ ನಮ ಎಲ್ಯ ಇತ್ತ, ಇತ್ತೆದಾತ್ ಬುದ್ದಿಲಾ ಬುಲೆದ್ ಇತ್ತಿಜಿ. ಮನಸ್‌ಡ್ ಕಲ್ಮಸ ಇತ್ತಿಜಿ, ಅವ್ ಇತ್ತೆಲಾ ಇಜ್ಜಿ ಪನ್ಕ. ದಾದಲ ಎಂಕ್ ಮಾತ್ರ ಬೋಡು, ಎಂಕೇ ಬೋಡು ಪನ್ಪಿನ ಹಟಲಾ ಇತ್ತಿಜಿ. ಪೂರಲ ಪಟ್ಟ್ ತಿನ್ಪಿನ ಕಾಲ. ಪತ್ತ್ ಪದ್ರಾಡ್ ಜೋಕ್ಲೆನ ಗ್ಯಾಂಗ್. ಐಟ್ ಆಯೆ, ಇಂಬೆ ಆನ್,  ಪೊನ್ನು ಪನ್ಪಿನ ಬೇದ ಬಾವ ದಾಲ ಇತ್ತಿಜಿ. ಜಾತಿ ನೀತಿಲಾ ಇತ್ತಿಜಿ. 

ಬದಲಾದ್, ಯಾನ್‌ಲಾ ಬುಲೆವೊಡು, ಎನ್ನ ಲೆಕ್ಕನೆ ಆಯನ್‌ಲಾ ಮಿತ್ ಕೊನೊವೊಡು ಪನ್ಪಿನ ಉಡಲ ನೆನ್ಕೆ.

ಇಂಚಿನ ಕಾಲೊಡು ಇಲ್ಲದಕುಲು ನಮ ಜೋಕ್ಲೆನ್ ಪೂರ ಒಟ್ಟಿಗೆ ಸೇರ್ಸಾದ್ ಕಂಡದ ಬೇಲೆ ಮಲ್ಪಾವೊಂದು ಇತ್ತೆರ್. ಬಜ್ಜೆಯಿ ಪೆಜ್ಜರೆ, ಅವೆನ್ ಸುಲಿಪರೆ, ಕೆಯ್ ತುಂಬೆರೆ,ಕೆಯ್  ಕೊಯ್ಯೆರೆ, ಕೆಯ್ ದರ್ಪೆರೆ, ಬೈತ ಮುಟ್ಟೆ ಕಟ್ಯರೆ, ಮುಡಿತ್ತ ಬಲ್ಲ್ ತಿರ್ಗಾಯರೆ, ಬಲ್ಲ್ ಒಯ್ತ್ ಪತ್ತೆರೆ, ಕನಕ್ ತುಂಬರೆ, ಕನಕ್ ಮುಟ್ಯರೆ, ಗೊಬ್ಬರ ತುಂಬ್ಯರೆ, ಕೈಕಂಜಿ ಮೇಪೆರೆ ನೆಕ್ ಪೂರ ಜೋಕುಲೆ. ದಾಯೆ ಪಂಡ ಅಕ್ಲೆಗ್ ಸಂಬಳ ಕೊರೊಡು ಪಂದಿಜ್ಜಿ. ಶೋಕುದ ವನಸ್ ಒಂಜಿ ಕೊರುಂಡ ಆಂಡ್. ಪುಗರ್ಂಡ ಜೋಕುಲು ವಾ ಬೇಲೆಲಾ ಮಲ್ಪಂದೆ ಇಪ್ಪುಜೆರ್.

ಅಪಗ ಬರಿತ ಇಲ್ಲದ ಏರ್ಲಾ ಬತ್ ಎoಕ್ಲೆನ ಜೋಕ್ಲೆಡ ದಾಯೆ ನಿಕುಲು ಬೇಲೆ ಮಲ್ಪಯರ್ ಪಂದ್ ಕೆನೊಂದುಲಾ ಇತ್ತಿಜೆರ್.  ದಾಯೆ ಪಂಡ ಬಾಲೆನ್ ಬರಿತ ಇಲ್ಲದಕ್ಲು ಬೇಲೆ ಕೊರುಂಡಲಾ ಎಡ್ದೆಡ್ ತೂವೊನುವೆರ್, ಬೇಲೆ ಕಲ್ಪಡ್, ಬಂಙದ ಬದ್‌ಕ್ ದಾದ ಪಂದ್ ಗೊತ್ತಾವಡ್ ಪನ್ಪಿನ ಮನಸ್‌ಡ್ ಇತ್ತ್ಂಡ್. ಅಂಚಾದ್ ಜೋಕ್ಲೆಗ್ ನಾಲ್ ಇಲ್ಲ್ ಒಟ್ಟಿಗೆ ಇತ್ಂಡ ನಾಲ್ ಇಲ್ಲ್‌ಲಾ ನಮ್ಮವ್ವೆ ಪನ್ಪಿನ ಮೋಕೆ ಇತ್‌ಂಡ್. ನಾಲ್ ಇಲ್ಲದ ಜೋಕುಲ್ಲಾ ಒಟ್ಟಿಗೆ ಕುಸಿಟ್ ಗೊಬ್ಬೊಂದು ಇತ್ತೆರ್. ನಾಲ್ ಇಲ್ಲದ ಮಲ್ಲಕುಲ್ಲಾ ಅಕ್ಲೆಗ್ ನುಪ್ಪು ಕೊರೊಂದು, ಬುದ್ಧಿ ಪನೊಂದು, ತಪ್ಪು ಮಲ್ತ್ಂಡ ಹಾಕೊಂದುಲ್ಲಾ ಇತ್ತೆರ್. ಜೋಕುಲು ನಾಲ್ ಇಲ್ಲದ ಜನಕ್ಲೆಗ್ಲಾ ಪೋಡ್ಯೊಂದು ಇತ್ತೆರ್. ಅಪಗ ಪೂರಕ್ಲು, ಪೂರ ಜೋಕುಲು ನಮ್ಮಕುಲೆ ಪನ್ಪಿನ ನಂಬುಗೆ, ಒರಿಯನ ಮಿತ್ತ್ ಒರಿಯಗ್ ನಂಬುಗೆ ಇತ್ಂಡ್. ಓವು ಆನ್ ಅಂಜೋವುನಕುಲಾ ಬರಿತ ಇಲ್ಲದ ಪೊನ್ನು ಬಾಲೆನ್ ಬೊರ್ಚಂದಿನ ದೃಷ್ಟಿಡ್ ತೂವಂದೆ ಎನ್ನ ಇಲ್ಲದ ಬಾಲೆ ಪನ್ಪಿಲೆಕ್ಕ ಅಕ್ಲೆಗ್ ಮೋಕೆ ಕೊರೊಂದು ಇತ್ತೆರ್. ಏರೆನ ಮನಸ್ದ ಉಲಯಿಲ ಕಲ್ಮಸ ಪನ್ಪಿನ ಇತ್ತಿಜಿ. 

ಕಂಡ, ಕಿದೆ, ಬಾಕ್ಯಾರ್, ಬೊಟ್ಟು, ಬೈಲ್, ತೋಟ, ಗುಡ್ಡೆ, ತಪ್ಪು, ಪಂತಿ - ಪಜಿರ್ ಇಂಚಿನ ಸಾವಿರ ಬೇಲೆ ಇಲ್ಲದಕ್ಲೆಗ್ ಆಂಡ ಜೋಕುಲೆನಲ ಸಾಯ ಬೊಡಿತ್‌ಂಡ್. ಅಕುಲು ಬೇಲೆ ಮಲ್ಪುನಗ ಜೋಕುಲೆಗ್ಲಾ ಒಟ್ಟಾದ್ ಗೊಬ್ಬೆರೆ ಪುರ್ಸೊತ್ತು ತಿಕ್ಕೊಂದು ಇತ್ತ್ಂಡ್. ಜೋಕುಲು, ಮಲ್ಲಕ್ಲು ಪೂರ ಒಟ್ಟಿಗೆ ಇಪ್ಪುನ ತೂಯರೆ ಎಡ್ಡೆ ಇತ್ಂಡ್. ಮಲ್ಲಕ್ಲು , ಜೋಕುಲು ಒರ ಒರ ಲಡಾಯಿ ಮಲ್ತೊಂಡೆರ್‌ಡಲಾ ನಾಲೈನ್ ದಿನೊಡ್‌ತ್ ಬೊಕ್ಕ ನನೊರ ಸರಿ ಆವೊಂದಿತ್ತೆರ್ . ಕಂಡ, ತೋಟದ ಆಸೆಗ್ ಲಡಾಯಿ ಆನಗ ಜೊಕುಲ್ಲಾ ತೂವೊಂದು ಇತ್ತೆರ್. ಮಲ್ಲಕ್ಲೆಡ್ ಏರೆನ ತಪ್ಪು, ಏರೆನ ಸರಿ ಪನ್ಪಿನ ಜೋಕ್ಲೆಗ್ ಗೊತ್ತಿತ್‌ಂಡ್. ಇಲ್ಲದಕ್ಲು ಪಾತೆರಿಜೆರ್‌ಡಲಾ ಸಾಲೆಡ್ ಜೋಕುಲು ಪೋನಗ ಬನ್ನಗ ಒಟ್ಟಾದ್ ಪಾತೆರೊಂದು ಇತ್ತೆರ್. ಗೊಬ್ಬೆರೆಲಾ ಒಟ್ಟುಗೆ ಮಲ್ಲಕ್ಲೆನ ಕನ್ ತಪ್ಪಾದ್ ಪೋವೊಂದು ಇತ್ತೆರ್.

ಜೋಕುಲು ಮಾತೆರ್ನ ಇಲ್ಲ ತೂದು ಒವ್ ಸರಿ ಒವ್ ತಪ್ಪು ಪನ್ಪಿನ ತೆರಿಯೊಂದು ಇತ್ತೆರ್ ಅವ್ವತ್ತಂದೆ ಮಲ್ಲಕ್ಲೆಗ್ ಗೌರವ ಕೊರ್ಪಿನೆನ್ಲ ಕಲ್ತೊಂದು ಇತ್ತೆರ್. ನಾಲ್ ಐನ್ ಇಲ್ಲದ ಜನಕ್ಲೆನೊಟ್ಟು ಸೇರ್ದ್ ಏರೆನ್ ಎಂಚ ಲೆಪ್ಪೊಡು, ಏರೆಗ್ ಎಂಚ ಮರ್ಯಾದಿ ಕೊರೊಡು, ಏರೆನೊಟ್ಟು ಎಂಚ ಇಪ್ಪೊಡು, ಎಂಚ ಪಾತೆರೊಡು, ಅಂಚಿದ ಇಲ್ಲದಕ್ಲು ಎಂಚ ಇಪ್ಪುವೆರ್, ಒವ್ ಎಡ್ಡೆ, ಒವ್ ಹಾಲ್ ಪನ್ಪಿನವು ಪೂರಾ ಜೋಕುಲು ಮಲ್ತೊಂದು ಪೂರ ಇಲ್ಲದ ಬೇನೆ ಬೇಜಾರ್‌ಗ್ ಒಂಜಾವೊಂದು ಇತ್ತಿನ ಎಡ್ಡೆ ಮನಸ್‌ದ ಕಾಲ ಅವ್ ಆದಿತ್ತ್ಂಡ್. 

ಇತ್ತೆ ಓದುದಿನ ಜನ ಮಾನಿ ಎಚ್ಚ ಆಂಡಲಾ ಒರಿಯನ ಇಲ್ಲಗ್ ಒರಿ ಸರಿ ಕಟ್ಟ್‌ಡ್ ಪೋಯರೆ ಪುರ್ಸೊತ್ ಇಜ್ಜಿ, ನನ ಒರಿಯನ ಕಷ್ಟ ಸುಕ ಕೇನ್ಯರೆ, ನಮ್ಮ ಸಾಹಿತ್ಯ ಸುಕ-ಕಷ್ಟ ಕೇನ್ಯರೆಗ್ಲಾ ಏರ್ಲಾ ಇಜ್ಜೆರ್, ಜೋಕುಲು ಪರ ಊರುಡು, ಪ್ರಾಯದಕುಲು ಊರುದ ಮಲ್ಲ ಇಲ್ಲದ ಉಲಯಿ. ಅಕ್ಲೆನ್ ಲೆತ್ ಕೇನುನಕುಲು ಏರ್ಲಾ ಇಜ್ಜೆರ್. ಅಕ್ಲೆಗ್ ಬೂರುಂಡ ನೀರ್ ಕೊರ್ಪಿನಕ್ಲು, ಬಾಯಿ ತುಂಬ ಪಾತೆರುನಕುಲ್ಲಾ ಇಜ್ಜೆರ್. 

ಕಾಲ ಬದಲಾದ್, ಜೋಕ್ಲೆಗ್ ನಮ ಕೊರ್ಪಿನ ವಿದ್ಯೆ ಬೇತೆ ಒವ್ವಾ ಊರುಡು ಬೆನೆರೆಗ್ ಆತ್ಂಡ್. ಬೆನ್ನಿದ ಬೇಲೆ ನಮ ಅಕ್ಲೆಗ್ ಕಲ್ಪದಿಜ , ಎರು ಏರ್ಮೆ ಕೈಕಂಜಿ ಕಟ್ಟ್ ತಾಂಕೆರೆಲಾ ಗೊತ್ತಿಜ್ಜಿ, ಬಜ್ಜೆಯಿ, ತಾರಾಯಿದ ಬೇಲೆಲೆನ್ ಓಲ್ತಾ ಬತ್ತಿನ ಗೌಡನಕ್ಲು, ಹಿಂದಿದಕ್ಲು, ಬಯ್ಯನಕುಲು ಮಲ್ಪುನ ಕಾಲ ಬೈದ್ಂಡ್. ಪ್ರಾಯ ಆಯಿನ ಪರಬೆರೆನ್ ತೂಯೆರೆಗ್ಲಾ ಓವ್ವಾ ಊರುದ ಬಾಸೆ ಬರಂದಿನ ಪೊಂಜೊವುನಕ್ಲೆಗ್ ಸಂಬಲ ಕೊರ್ದು ದೀವೊನ್ನ ಕಾಲ ಬೈದ್ಂಡ್. ಆವು ಪೂರ ಸಯ್ಯಡ್ , ಸೈತ್ಂಡ ಬುಲಿಪೆರೆಗ್ಲಾ ಪಿದಾಯಿಡ್ದ್ ಜನ ಲೆಪ್ಪುನ ಕಾಲ ಉಂದು. 

ನೆನ್ ಪೂರ ತೂನಗ ಪಿರವುದ ಆ ದಿನೊಕ್ಕುಲೆ ಎಡ್ಡೆ ಇತ್‌ಂಡ್ ಪಂದ್ ತೋಜ್ಜಾ? ನಿಕುಲು ದಾದ ಪನ್ಪರ್? 

@ಹನಿಬಿಂದು@

ಟಂಕಾ

ಟಂಕಾ 

ಬಾರೀ ಬರ್ಸಗೆ

ರೇಡ್ಯೊಡ್ ಪಂತೆರ್ ಗೆ

ಕಾತ್ ಕುಲ್ಲುದೆ

ಬಯ್ಯಡಾಂಡಲ ಬರ್ವಾ

ನಾಲ್ ಪನಿ ಬೂಮಿಗ್

@ ಹನಿಬಿಂದು@

07.05.2026

ಚಿಟ್ಕಾ

ಆಲ್ 

ಆಲ್ ಬತ್ತಲ್ ಎನ್ನ ಕೈತಲ್

ತೂದು ಕಿಸ್‌ಕ್ಕ ತೆಲ್ತಲ್

ತೆಲ್ತ್ ಮರ್ಲ್ ಕಟ್ಟಾಯಲ್

ಇನಿ ಆನ್ ಬಾಲೆ ಪೆದ್ಯಲ್ 

@ಹನಿಬಿಂದು@

ಗಝಲ್

ಗಝಲ್

ನಮ್ಮ ಬದ್‌ಕ್‌ದ ಬಿಲೆ ನಮಕ್ ಗೊತ್ತಾವೊಡು 

ಬೇತೆಕ್ಲೆನಲಾ ಬಂಜಿದ ಬಡವು ಜನಕ್ ಗೊತ್ತಾವೊಡು

ಬಾರಿ ಮಲ್ಲ ಮಲ್ಲ ಪಾತೆರುನಕ್ಲು ಉಲ್ಲೆರ್

ಒರಿನಕ್ಲೆನ ಬೇನೆ, ಅಕ್ಲೆನ ಪಿರಾಕ್ ಗೊತ್ತಾವೊಡು

ನಡತಿನಾಯನ ಬಂಙ ಕುಲು ತಿನ್ಪಿನಾಯಗ್ ಗೊತ್ತಿಜ್ಜಿ 

ಅಪ್ಪೆ ಮಟ್ಟೆಲ್ದ ಬೇಜಾರ್ ಉಡಲ್ದ ಕಲೊಕ್ ಗೊತ್ತಾವೊಡು

ಬಿತ್ತ್ ಪಾಡ್ದ್ ಮಲ್ಲ ಮಲ್ತ್ ಬೇತೆಕ್ಲೆಗ್ ತಿನ್ಪಾವೆ ಬೆನ್ಪಿನಾಯೆ

ನಡುತ ಬೇಲೆದ ಸಗ್‌ತಿ ಪರ ಕೈಕ್ ಗೊತ್ತಾವೊಡು

ಪನಿ ಬರ್ಸೊದ ಕಾಪು ಕಂಡೊದ ಮನ್ನ್‌ಗ್ ಮಾತ್ರನಾ 

ಬರ್ಸ ಬೂರುನ ಕಜ್ಜ ಮಾನಿಲೆ ತರೆಕ್ ಗೊತ್ತಾವೊಡು..

@ಹನಿಬಿಂದು@

27.04.2026

ಅಪ್ಪೆ ಭಾರತಿ

ಅಪ್ಪೆ ಭಾರತಿ

ಅಪ್ಪೆ ಭಾರತಿಗ್ ತುಲುವಪ್ಪೆ ಮಗಲೆನ ಆರತಿ
ಚಪ್ಪೆ ಆವಂದ್ ಏಪಗ್ಲಾ ಮೋಕೆದ ಸಗ್‌ತಿ
ಪಚ್ಚೆ ರಂಗ್‌ಡ್ ಮೆರೆಪಿನವು ವಾ ಶೋಕು
ನಿಚ್ಚಲಾ ನಟ್ಟೊನುವೆ ವರ ಕೊರ್ಲೆ ನಂಕ್//

ತಾರೆ ಬಾರೆ ಕಂಗ್ ಕುಕ್ಕುದ ಮರತ ಸಾಲ್ ಸಾಲ್
ಇರೆ ಉಡಲ್ ದಿಂಜಾವುನ ಗುಡ್ಡೆಲೆನ ಪಾಲ್ ಪಾಲ್
ಹಿಮಾಲಯೊಡು ಪುಟ್ಟುನ ತುದೆಕ್ಲೆನ ನೀರ್ದ ರುಚಿ
ಮಲಯ ಮಾರುತ ಕನಪಿನ ಬರ್ಸೊದ ನೀರ್ದ ಸುಚಿ

ಸಾರ ಕವಿಕ್ಲೆನ್ ಮಾನಾದಿಗೆ ಮಲ್ತಿನ ನಮ್ಮ ಬೂಡು
ಮಲ್ಲ ಜನೊಕ್ಲೆನ್ ಊರು ಪರವೂರುಗು ಕೊರಿನ ನಾಡ್
ನಲಿಪುಗ ನಮ ಮಲ್ಲ ಕುಸಿಟ್ ನಿಚ್ಚ ಮೂಲು
ಯಾನ್ ಪೆರ್ಮೆದ ಅಪ್ಪೆ ಭಾರತಿನ ಮಗಲ್..
@ಹನಿಬಿಂದು@
22.12.2025

ಅಂಚೆ ದಿನ ಲೇಖನ

ಅಕ್ಟೋಬರ್ 9 – ವಿಶ್ವ ಪೋಸ್ಟ್ ಅಪಿಸ್‌ದ ದಿನ

ಅಕ್ಟೋಬರ್ ತಿಂಗೊಲ್ದ 9ನೇ ದಿನ, ವಿಶ್ವ ಅಂಚೆ ದಿನ (World Post Day) ವಿಶ್ವ ಪೋಸ್ಟ್ ಆಪೀಸ್ದ ದಿನ ಪಂದ್ ಆಚರಣೆ ಮಲ್ಪುವೆರ್. ಉಂದು ಆ ದಿನೊತ್ತ ಪಿರಾವುದ ಕತೆ  ದಾದ ಪಂಡ  1874 ನೇ ವರ್ಷದ ಅಕ್ಟೋಬರ್ 9 ದಾನಿ ಸುರು  ಆಂಡ್. ಆ ದಿನ ಸ್ವಿಟ್ಜರ್‌ಲ್ಯಾಂಡ್‌ನ ಬೆರ್ನ್ ನಗರಡ್,ಯೂನಿವರ್ಸಲ್ ಪೋಸ್ಟಲ್ ಯೂನಿಯನ್ (UPU) ಪಂದ್ ಒಂಜಿ ಅಂತರರಾಷ್ಟ್ರೀಯ ಸಂಸ್ಥೆ ಸ್ಥಾಪನೆ ಆಂಡ್. ಉಂದೆತ್ತ ಉದ್ದೇಶ ದೇಸ ಸೇವೆ ಅಂಚೆನೆ  ಪೊಸ್ಟ್ ದ ಸೇವೆಗ್ ಒಂಜಿ ನಿಯಮ, ಒಂಜಿ ವ್ಯವಸ್ಥೆ ಕನವೊಡು ಪನ್ಪಿನವು.ಬೊಕ್ಕ ಸಮುದಾಯದ ಸೇವೆ ಸುಲಭ ಮಲ್ಪುನವು ಆದಿತ್ತ್ಂಡ್.

UPU ಸ್ಥಾಪನೆ ಆಯಿನ ದಿನೊತ್ತ ನೆಂಪುಗು 1969 ರ್ದ್ ವಿಶ್ವ ಅಂಚೆ ದಿನ ಆಚರ್ನೆ ಮಲ್ಪುನ  ಸುರು ಆಂಡ್. ಅವೆರ್ದ್  ಬೊಕ್ಕ, ಅಕ್ಟೋಬರ್ 9 ದಾನಿ  ಪ್ರತಿ ವರ್ಸ ಅಂಚೆ ಸೇವೆದ ಮಹತ್ವ ಜನೊಕ್ಲೆಗ್ ತೋಜಾಯರೆ, ಆವೆತ ಬಗ್ಗೆ ವಿಸಯೊ ಕೊರಿಯೆರೆ,  ಜೋಕ್ಲೆಗ್, ಜವನೆರೆಗ್ ಪೋಸ್ಟುದ ಬಗ್ಗೆ ಎಡ್ಡೆ ಪ್ರೇರಣೆ ಕೊರ್ಪುನ. ಬೇಲೆನ್ ಆವು ಮಲ್ತೊಂದು ಉಂಡು. 

ಅಂಚೆ ಸೇವೆ – ಕಾಲದ ಬದಲಾವನೆ

ಪಿರಾವುದ ಕಾಲೊಡ್ದು ಜನ ಕಾಗಜಿ ಬರೆಪೆರ್, ದುಂಬು ತಾರಿದ  ಒಲಿಟ್ಟ್  ಬರೆವೊಂಡು  ಇತ್ತೆರ್. ಬೊಕ್ಕ ಬೊಕ್ಕ ಪೇಪರ್ ಬತ್ಂಡ್. ನಮಕ್ ನಮ್ಮಕ್ಲೆಗ್ ದಾದಾಂಡಲಾ ವಿಸಯೊ, ಮಾಹಿತಿ ಮುಟ್ಟಾವೊಡಾಂಡ, ವಿಸಯೊಲೆನ್ ಅರಿಕೆ ಮಲ್‌ತೊನೊಡು ಪಂದ್ ಆಂಡ, ಮನಸ್ದ ಪತೆರೊಲೆನ್ ನಮ್ಮಕ್ಲೆಡ ಪಟ್ಟೊನೊಡು ಪಂದ್ ಆಂಡ ಅಪಗದ ಕಾಲೊಡು  ಫೋನ್ ಇತ್ತಿಜಿ. ಅಪಗ. ತನ್ಕ್ ಗೊತ್ತಿತ್ತಿ ಅಚ್ಚರೊಡು ಪೇಪರ್‌ಡ್ ಬರೆದ್ ಪಿರವುಡು ಆವು ಏರೆಗ್ ಸೇರೊಡ ಅಕ್ಲೆನ ಎಡ್ದ್ರಸ್ ಬರೆದ್ ಪೋಸ್ಟ್ ದ ದಬ್ಬಿಗ್ ಪಾಡ್ಂಡ ಮನದಾನಿ ಕಾಂಡೆ ಪೋಸ್ಟ್ ಮ್ಯಾನ್ ಅವೆನ್  ಪತೊಂದು ಪೋಪೆರ್. ಬೊಕ್ಕ ಆವು ವಾ ಊರುಗು ಪೋವಡಾ ಆ ಊರುಗು ಸೀಲ್ ಪಾಡ್ದ್ ಅವೆನ್ ಬಸ್ ಟ್ಟಾ ಇಜ್ಜಿಂಡ ರೈಲ್ ಡಾ ಪಾಡ್ದ್ ಕಡಪುಡುವೆರ್. ಅವೆರ್ದ್ ಬೊಕ್ಕ  ಒಂಜಿ ವಾರ ಕಾಪೊಡು.  ಅಪಗ ಆವು ನಮಕ್  ಬೊಡಿತ್ತಿನಕ್ಲೆಗ್  ತಿಕ್ಕುಂಡು, ಅಕ್ಲೆಗ್ ಓದೆರೆ ಬತ್ಂಡ ಅಕುಲು ಓದುದು ಅರ್ಥ ಮಲ್ತೊನ್‌ವೆರ್ . ಇಜ್ಜಿಡ ಪೋಸ್ಟ್ ಮೆನ್ ಇಜ್ಜಿಡ ಏರಾಂಡ ಬರವು ಕಲ್ದಿನಕ್ಲೆಡ ಅವೆನ್ ಓದದ್ ಇಸಯ ತೆರಿಯಾನುವೆರ್. ಅಕ್ಲೆಗ್ ಪಿರ ದಾದಾಂಡಲ ನಮಕ್ ಪನೊಡಾಂಡ ಪಿರ ಕಾಗಜಿ ಬರೆಪೆರ್ ನಮಕ್. ಬೇಗ ಪೋವೊಡಾಂಡ ಟೆಲಿಗ್ರಾಮ್. ಆಂಡ ಆವು ಬತ್೦ಡ ಮಾತೆರ್ಲಾ ಪೋಡ್ಯೊಂದು ಇತ್ತೆರ್. ಏರೆನಾಂಡಲ ಸಾವುದ ಸುದ್ದಿ ಬರ್ಪುಂಡಾ ಪಂದ್. 

ಆಂಡ ಆ ಕಾಕಜಿ ಬರೆಪಿನ ಬೇಲೆಡ್ ನಮಕ್ ಮಸ್ತ್ ಖುಷಿ ಇತ್ಂಡ್. ನಮ್ಮ ಉಡಲ್ದ ಪಾತೆರೊನು ಪೂರ ನಮ್ಮ ಕೈಟೇ ಬರೆದ್ ಅವೆನ್ ನಮಕ್ ಬೊಡಾಯಿನಕುಲು ಓದುನ, ಅಕುಲು ಅವೆನ್ ಓದುದು ಐಕ್ ಪಿರ ಜರೂರು ಕಾಕಜಿ ಬರೆಪಿನ, ಐಕ್ ದಿನ ದಿನ ಪೋಸ್ಟ್ ಮೇನ್ ನ್ ಕಾಪುನ ಆವು ಪೂರ ಒಂಜಿ ಕುಸಿತ ಅನುಭವ ಆದಿತ್ಂಡ್. ಅವೆಟ್ ನಮಕ್ ಹೃದಯ ಸ್ಪರ್ಶದ ಅನುಭವ ತಿಕ್ಕೊಂದು ಇತ್ಂಡ್. ಒಂಜಿ ಕಾಕಜಿ ಬತ್ಂಡ ಅವೆನ್ ಒಂಜಿ ಸರ್ತಿ ಮಾತ್ರ ಅತ್ತ್ ನಾಲೈನ್ ಸರ್ತಿ ಓದೊಂದು ಇತ್ತ. ಆತೆ ಅತ್, ಒಯ್ತ್ ಒಯ್ತ್ ಗೆತೊಂದು ಇಲ್ಲದ ಜೊಕ್ಲೆಡ್ದ್ ಪತ್ ಮಲ್ಲಕ್ಲೆ ಮುಟ್ಟ ಮಾತೆರ್ಲಾ ಓದೊಂದು ಇತ್ತೆರ್. ಹಿರಿಯಕ್ಲೆಗ್ ಓದರೆ ಬತ್ತಿಜಿಡ ಅಕ್‌ಲು ಜೋಕ್ಲೆಡ ಜೋರು ಜೋರು ಓದದ್ ಇಸಯ ತೆರಿಯೊಂದು ಇತ್ತೆರ್. ಆತೆ ಅತ್, ಕಂಡನಿ ಸೈತಿನ ಪೊಂಜೋವುಲೆಗ್, ಆಜಿಪ ವರ್ಸ ಕರಿನಕ್ಲೆಗ್ ಪೂರ ಗವರ್ಮೆಂಟ್ ದ ಕಾಸ್ ಬರೊಂದು ಇತ್‌ಂಡ್. ಪ್ರತಿ ತಿಂಗೊಲು ಬರ್ಪಿನ ಆ ಕಾಸ್ ಗ್ ಜನ ಕಾತೊಂದು ಇತ್ತೆರ್. ಕಾಸ್ ದಾಂತಿನ ಆ ಕಾಲೊಡು ನೂದು ರೂಪಾಯಿ ಬತ್ಂಡ ಅವು ಮಾಮಲ್ಲ ಕಾಸ್. ಐಟ್ ಬಾರಿ ಬೇಲೆಲು ಆವೊಂದಿತ್ತ. ಆ ಕಾಸ್ ಕಂತ್ ಕೊರಿನ ಪೋಸ್ಟ್ ಮೆನ್ ನ ಮಿತ್ ಖುಷಿ ಆದ್ ಐನ್ ರುಪಾಯಿನ್ ಪೊoಜೊವುನಕುಲು ಅರೆಗ್ ಕೊರೊಂದು ಇತ್ತೆರ್. ಅಂಚ ಮಸ್ತ್ ಜನ ಕೊರಿನ ಕಾಸ್ ಅರೆಗ್ ಕಮ್ಮಿ ಸಂಬಳ ಆಂಡಲಾ ದಿನ ದೆಪ್ಪೆರೆ ಎಡ್ಡೆ ಆವೊಂದು ಇತ್‌ಂಡ್. ಇತ್ತೆದ ಕಾಲೊಡು ಐನ್ ರುಪಾಯಿಗ್ ದಾಲ ಬರ್ಪುಜಿಡಲ ಅಪಗ ಆವು ಮಲ್ಲನೆ ಆದಿತ್‌ಂಡ್. ಐಟ್ ಒಂಜಿ ಎಡ್ಡೆ ಪಾತೆರ ಕತೆ, ಸಂಬಂಧ ಒರಿಯೊಂದು ಇತ್ಂಡ್. 

ಅವ್ವೇ ಅತ್ತಂದೆ ಪೋಸ್ಟ್ ಆಪೀಸ್ ಬದಲಾದ್ ಪೊಸ ಪೊಸ ಕೆಲಸೊಲು ಬತ್ತ. ಕರೆಂಟ್ ಬಿಲ್ ಕಟ್ಟುನ ಸುರು ಆಂಡ್. ಬೊಕ್ಕ ಕಾಸ್ ಮಿನಿ ಇತ್‌ಂಡ ಅವುಲೆ ಕಟ್ಟೊಲಿ, ತಿಂಗೊಲು ತಿಂಗೊಲು ಆರ್ಡಿ ಕಟ್ಟೊಲಿ, ಬೊಕ್ಕ ಇನ್ಸೂರ್ ಮಲ್ಪೊಲಿ ಬ್ಯಾಂಕ್ ದ ಲೆಕ್ಕನೆ  ಪಾಸ್ ಬೂಕು ಮಲ್ತ್ ಅಲ್ಪಲಾ ಕಾಸ್ ಕಟ್ ದ್ ನಮಕ್ ಬೋಡನಗ  ಗೆತೊನೊಲಿ. ಕಾಕಜಿ ಮಾತ್ರ ಅತ್ ಬೇತೆ ಪಾರ್ಸಲ್ ಲಾ ಕಡಪುಡೊಲಿ. ಬೂಕು, ಕುಂಟು, ತಿಂಡಿ ಇಂಚಿನ ಪೂರ ನಮಕ್ ಬೋಡಿತ್ತಿನಕ್ಲೆಗ್ ಕಡಪುಡ್ದು ಕೊರೊಲಿ. ಇಂಚಿನ ಪೂರ ಪೊಸ ಪೊಸ ಅವಕಾಸೊಲು ಬನ್ನಗ ಜನಕ್ಕುಲು ಪೋಸ್ಟ್ ಆಪೀಸ್ ಗ್ ನನಲಾ ಮುಟ್ಟ ಬತ್ತೆರ್. ಜನಕ್ಲೆನ ಬದ್ಕ್ ಡ್ ಆವು ಒಂಜಿ ಅಂಗ ಆಯಿಲೆಕ್ಕ ಆಂಡ್. 

ಆಂಡ ಕಾಲ ಬಡಲಾಯಿಲೆಕ್ಕನೆ ಜನ ಬೊಕ್ಕ ನಮಕ್ ತಿಕ್ಕುನ ಸೇವೆಲಾ ಬದಲ್ ಆಂಡ್. ಇಲ್ಲಡೆ ಕುಲ್ಲುದು ಬೇಲೆ ಮಲ್ಪುನ ಸುರು ಆಂಡ್. ಅಪಗ ಪೋಸ್ಟ್ ಅಪೀಸ್ ಲ ಮೊಬೈಲ್ ಬ್ಯಾಂಕಿಂಗ್ ಆಕ್ಟಿವೇಟ್ ಮಲ್ಪೊಡಾಂಡ್. ಅಂಚ ಪೋಸ್ಟಲ್ ಬ್ಯಾಂಕಿಂಗ್ ಬತ್Oಡ್. ಇನ್ಸೂರೆನ್ಸ್ ಬತ್೦ಡ್. 

 ಜನ ಕಾಕಜಿ ಬರೆಪಿನ, ಪಾಡುನ ಕಾಪುನ ಕಾಲ ಪೋಂಡು. ಮೇಸ್ಸೇಜ್ ಬತ್‌ಂಡ್. ಅಂಚ ಕಾಸ್ ಲಾ ಮೊಬೈಲ್ ಡ್ ಪಾಡುಲೆಕ್ಕ ಆಂಡ್. 

ಆಂಡ ನನಲಾ ಪೋಸ್ಟ್ ಆಪೀಸ್ ನನಲಾ ಪೂರ ಊರುಡುಲಾ ಉಂಡು. ಬೇಲೆದ ಕಾಕಜಿಲು, ಅಪೀಸ್ ದ ಕಾಕಜಿಲು ಇತ್ತೆಲಾ ಐಟೇ ಬರ್ಪಿನಿ. ಪಾರ್ಸೆಲ್ ಕಮ್ಮಿ ರೇಟ್ ಡ್ ಐಟೇ ಬರ್ಪುನಿ. ದೂರೊದ ಊರುಲೆಗ್, ಬೇತೆ ದೇಸೊಗು ದಾದಾಂಡಲಾ ನಮ್ಮಕ್ಲೆಗ್ ಕಡಪುಡೊಡು ಪಂದ್ ಆಂಡ ಐಟೇ ಸುಲಭ. ಅಂಚಾದ್ ಪೋಸ್ಟ್ ಆಪೀಸ್ ಗ್ ಇತ್ತೆಲಾ ಅವ್ವೇ ಅಯಿನ ಬಿಲೆ ಉಂಡು. ಸ್ಟಾಂಪ್ ಲಾ ಅಲ್ಪನೇ ತಿಕ್ಕುನು. 

ಇತ್ತೆ ಸುಖನ್ಯಾ ಸುರಕ್ಷಾ, ಜೂವೊದ ಇನ್ಸೂರೆನ್ಸ್, ಪೆನ್ಷನ್ ಪ್ಲಾನ್ ಇಂಚಿನ ಪೂರ ಬೈದ್ಂಡ್. ಮಾತ್ರ ಆತ್, ಪೋಸ್ಟುದ ಏ ಟಿ ಎಂ ಲಾ ಉಂಡು. ನೆನ್ ಪೂರ ನಮ ಗಲಸೊಂದು  ಬರೊಡು ಆತೆ. ಅಪಗ ಅಂಚೆ ದಿನ ಮಲ್ತಿನ ಸಾರ್ಥಕ ಅತೆ ?ನಿಕ್ಲು ದಾದ ಪನ್ಪರ್? 

@ಹನಿಬಿಂದು@

01.10.2025

ಹಾಯ್ಕು

ಹಾಯ್ಕು

ಈ ವರ್ಸ ಬರ್ಸ

ಬುಡ್ಪಿನ ಓಲ್ಲ ತೋಜ್ಜಿ

ಬರ್ಸೊದ ಪರ್ಬ

@ಹನಿಬಿಂದು@

18.10.2025

ಮಾಜಂದೀ ಗಾಯ

ಮಾಜಂದಿ ಗಾಯೊ

ಈ ಎನ್ನ ಬಾಲ್ ಗ್ ಬತ್ತ

ಖುಷಿ ಕೊರ್ಪ ಪಂದೆ ನೆಂತೆ

ಕೈಪೆದ ಬಿತ್ತ್ ಪಾಡ್ದ್ ಪೋಯತ್ತ

ನನ ಅವೆನೆಂಚ ತಾಂಗೊನೊಡು ಮಿತ್ತ್..

ಮೈಕ್ ಮಾತ್ರತ್ ಇನಿ

ಈ ಉಡಲ್ ಗ್ಲಾ ಬೇನೆ ಕೊರ್ಯ 

ಸೈತ್ ಪೋಪಿನಡೆ ಆಯೆ

ಬೇನೆನ್ ಪಟ್ಟೊನುನು ಏರ್ಯ..

ಕೈತಲ್ ಬನ್ನಗ ಬರ್ಪುಂಡು ಕೋಪ

ಮೂಂಕು ಮುಟ್ಟ ಪರ್ದ್ ಬೂರ್ದು 

ಬೆನಂದೆ ಏರೆನ್ಲಾ ತೂವಂದೆ 

ಏರ್ಲಾ ಪನ್ಯ ಕೇನಂದೆ 

ತನ್ನೊಚ್ಚಿಡೆ ನಡತನ ಬುಡಂದೆ

ಇನಿ ಪೂರ ಬುಡ್ದು ಪೋಯೆರಾ ಪನoದೆ 

ಯಾನ್ ನಿಕ್ಕಾದ್ ಎನ್ನ ಬಾಲ್‌ನ್ ದಾಯೆ

ಹಾಲ್ ಮಲ್ತೊನೊಡು ಇತ್ತೆ

ಓಡೆ ಬೊಡಾಂಡ ಪೋಲ

ಎನ್ನಾತೆಗೆ ಯಾನ್ ನನ 

ನಿನ್ನಾತೆಗೆ ಈ ಯಾನ್ ನಿಕ್ ಕನ

ನಿನ್ನ ಬಾಲ್‌ವೆಡ್ ನನ ಯಾನಿಜ್ಜಿ

ಎನ್ನ ಉಡೆದ್ ಪೋಯಿನ ಕನ್ನಡಿದ

ತುಂಡು ತುಂಡುಡುಲಾ ಈ ಇಜ್ಜ..

@ಹನಿಬಿಂದು@

10.09.2025

ಚಿಟ್ಕಾ

ಚಿಟ್ಕಾ

ಮಲ್ಲ ಮಲ್ಲ ಪನಿಬೂರ್ನಗ ನಿನ್ನ ನೆನಪು

ಮಲ್ಲದಿಗೆ ತೋಜದ್ ತಿಂತಿನಿ ನುಪ್ಪು

ಮಲ್ಲಾಯೆ ಒರಿಯೆ ಮಿತ್ತ್ ಡ್ದ್  ತೂಪಿನಾಯೆ

ಮೆಲ್ಲ ಕೊರ್ದು ಪಿರ ದೆತೊನ್ನಾಯೆ 

@ಹನಿಬಿಂದು@

05.08.2025

ಚಿಟ್ಕಾ

ಚಿಟ್ಕ 

ನಾಟಕ

ಇಲ್ಲದ ಉಲಾಯಿ ನಾಯಿದ ನಲಿಕೆ

ಪಿದಯಿಡ್ ತೂನಗ ಮಾಮಲ್ಲ ತೆಲಿಕೆ 

ಅಲ್ಪ ಮುಲ್ಪ ತಿಂದ್‌ದ್ ಬಲಕೆ 

ಎಂಕುಲೆ ಮಲ್ಲ ಪನ್ಪಿ ಮನಸ್‌ದ ಎನಿಕೆ 

@ಹನಿಬಿಂದು@

08.04.2025

ಬಲದೆ

ಬಲದೆ ಪಾರ್ ಬಲದೆ

ಈ ಎನ್ನ ಮೊಕೆದ ಸಿಂಗಾರಿದೆ 

ತೂಲದೆ ಏನನ್ ತೂಲದೇ 

ಯಾನೆ ನಿನ್ನ ಆಪಿನ ಕಂಡನಿದೆ

ಬಾರೀ ಶೋಕುಡೇ ಪಿದಾಡ್ತ್ ಬೈದ ಅಡೆಗ್ 

ಭೂರೀ ಭೋಜನ ತಿನಿಯರೇ ಬಲೆ ಇಡಗ್

@ಹನಿಬಿಂದು@

01.03.2025

happy women's day

ಪೊಂಜೊವುಲೆನ ದಿನತ ಎಡ್ಡೆಪುಲು

ಮಾಚ್ ಎನ್ಮ ತಾರೀಕ್ ಪನ್ನಗ ಪೊಂಜೊವುಲೆನ ದಿನ. ಪೂರಾ ಪೊಂಜೊವುನಕ್ಲೆಗ್ಲಾ ಎಡ್ಡೆಪುನು ಬಯಕೊಂದು ಮಾಮಲ್ಲ ಕಜ್ಜ ಮಲ್ತ್ ಪುದರ್ ಪೋಯಿನ ಪೊಂಜೊವುಲು ನಮ್ಮೊಟ್ಟು ಪಾಕ ಜನ ಉಲ್ಲೆರ್. ಅಕುಲು ಪೂರಾ ಸಾಧನೆ ಮಲ್ಪೊಲಿ ಪಂಡ ನಮ ದಾಯೆ ಮಲ್ಪರೆ ಬಲ್ಲಿ?

      ಸುಧಾ ಮೂರ್ತಿ ,ಸಾರಾ ಅಬೂಬಕ್ಕರ್ , ಮದರ್ ತೆರೇಸಾ, ಕಿರಣ್ ಬೇಡಿ, ಶಿಲ್ಪಾ ಶೆಟ್ಟಿ, ಐಶ್ವರ್ಯ ರೈ, ಭುವನೇಶ್ವರಿ ಹೆಗಡೆ, ನಿರ್ಮಲಾ ಸೀತಾರಾಮನ್, ದ್ರೌಪದಿ ಮುರ್ಮು, ಇಂದಿರಾ ಗಾಂಧಿ ಇಂಚಿನ ಪೊಂಜೊವೆನಕ್ಲು ಸಾಧನೆ ಮಲ್ತ್ ಸಾಧಕೆರಾದ್ ನಮ್ಮ ಎದುರು ತೋಜದ್ ಕೊರ್ತೆರ್. ಅಕ್ಲೆನ ಸಾಧನೆ ತುದಾಂಡಲ ನಮಲ ದಾಲ ಎಲ್ಯ ಆಂಡಲ ಸಾಧನೆ ಮಲ್ಪೊಡು ಪನ್ಪಿನ ನಮ್ಮ ಮನಸ್‌ ಗ್ ಬತ್ತ್ , ಆ ದಿಸೆಟ್ ನಮ ಆಲೋಚನೆ ಮಲ್ತಡ ಪೊಂಜೊವುಲೆನ ಪವರ್ ನ್ ನಮ ಪ್ರತಿ ಒರಿಲಾ ತೋಜವೊಲಿ.

     ಅಂಗಡಿ, ಆಸ್ಪತ್ರೆ, ಆಫೀಸ್, ಶಾಲೆ, ಕೋಲ, ನೇಮ ಅತ್ತಂದೆ ಇತ್ತೆ ದೇಸೊದ ಮಿಲಿಟ್ರಿಡ್ಲಾ ಉಲ್ಲ ನಮ. ಪುಣ ಪೊತ್ತಾವುನ, ರಿಕ್ಷಾ, ಕಾರ್, ಬಸ್, ಲಾರಿ, ರೈಲ್, ಮೆಟ್ರೋ, ವಿಮಾನ ಬುಡ್ಪಿನ ಬೇಲೆನ್ಲಾ ಪೊಂಜೊವುನಕ್ಲು ಮಲ್ಪುವೆರ್ ಪಂದ್ ಆಯಿ ಬೊಕ್ಕ ಪೊಣ್ಣು ಒಲ್ಪ ಒಯ್ಟ್ ಕಮ್ಮಿ ಪನ್ಲೆ??

    ಆಲ್ ಅಂಚ, ಮೋಲ್ ಇಂಚ ,ಬರಿತ ಇಲ್ಲದಕ್ಲು ಸರಿ ಇಜ್ಜೆರ್, ಪಿಚ್ಚರ್ ಆ್ಯಕ್ಟರ್‌ನಕ್ಲು, ಕ್ರಿಕೆಟ್ ಮೊಕ್ಲೆನ ಬಗ್ಗೆ ಪಾತೆರೊಂದು ಕುಲ್ಲುಂಡ ನಮ್ಮ ಬದ್‌ಕ್ ಏಪ ಉದ್ದಾರ ಆಪಿನಿ? ನಮ ನಮ್ಮ ಬಾಳ್ವೆದ ಬಗ್ಗೆ ತೂವೊಡು. ನಾಯಿದ ಲೆಕ ಪುಟ್ಟುದು ತಿಂದ್‌ದ್ ಕಿನ್ನಿ ದೀದ್ ನಾಯಿದ ಲೆಕ್ಕ ಸೈತ್ ಪೋಂಡ ನಮಕ್ ಲಾ ನಾಯಿಗ್ ಲಾ ಎತ್ವಾಸ ದಾದ ಉಂಡು? ನಮ ನರಮಾನಿ ಆಯಿ ಬೊಕ್ಕ ಈ ಬೂಮಿಡ್ ನಮ ಸೈತ್ ಪೋಯಿ ಬೊಕ್ಕಲಾ ನಮ್ಮ ಪುದರ್ ಒರಿಯೊಡುಂದು ಆಂಡ ನಮ ನಮ್ಮ ಪುದರ್ ಒರಿಪು ಲೆಕಂದಿ ದಾದಂಡಲ ಎಡ್ಡೆ ಬೇಲೆ ಮಲ್ಪೊಡು. ಅವು ನಾಲ್ ಜನಕ್ ಸಾಯ ಆವೊಡು. 

  ಒಂಜಿ ಪೊಣ್ಣು ಬಂಞ ಬತ್ ದಾದಾಂಡಲ ಮಲ್ಪೊಡು ಪಂದ್ ಎನ್ನಿಯಲ್ಡ ,ದಾದಾಂಡಲ ಮಲ್ತ್ ಆಲ್ ಅವೆನ್ ಸಾಧನೆ ಮಲ್ಪಂದೆ ಬುಡಯಲ್. ಆ ತಾಳ್ಮೆ ಪೊಣ್ಣಡ ಇಪ್ಪುನ ಕಾರಣ ಆಲ್ ಪೋಯಿನಲ್ಪ ಪೂರ ಗೆಂದ್‌ದ್ ಬರ್ಪಲ್. ಅಂಚಾದ್ ಇಪ್ಪುನಗ ನಮ ಪೂರ ದಾದಾಂಡಲ ಬೇತೆಕ್ಲೆಗ್ ಎಡ್ಡೆ ಮಲ್ಪರೆ ಪಿದಾಡ್‌ಗ. 

  ಪೊಣ್ಣು ಮನ್ನ್ ದ ಬಾಜನ ಅತ್ತ್. ಆಲ್ ಕ್ಷಮೆತ್ತ ಸಾಗರ. ವಾ ಕಜ್ಜೊಲೆನ್ಲಾ ನಡಪಾದ್ ಕೊರ್ಪಿ ಗೆಲ್ಮೆ, ತಾಳ್ಮೆ, ಮೋಕೆ, ದೇಕಿ, ಶೋಕು ಅಲೆಡ ಉಂಡು. ಅಂಚ ಪೊಣ್ಣ ಕಾರ್ಯ ಏಪಲಾ ಪುಗಾರ್ತೆ ಪಡೆವುನವು. ನಮ ಪೊನ್ನುಲು ಪೂರಾ ಈ ದಿಸೆಟ್  ಆಲೋಚನೆ ಮಲ್ಪುಗ. 

@ಹನಿಬಿಂದು@

08.03.2025