ಕವಿತೆ ಹುಟ್ಟಿದ್ದು ಅಲ್ಲಿ

ಕವಿತೆ

ಕವಿತೆ ಹುಟ್ಟಿದ್ದು ಅಲ್ಲಿ ...

ಬಚ್ಚಲು ಮನೆಯ ಬದಿಯಲ್ಲಿ

ಬಟ್ಟೆಗಳೆ ಇಲ್ಲದೆ ಕೊರೆವ ಚಳಿಯಲ್ಲಿ ಅಳುತ್ತಿದ್ದ ಕಂದಮ್ಮನ ಮಡಿಲಲ್ಲಿ

ಕೊರೆವ ಹಿಮವನ್ನೂ ಲೆಕ್ಕಿಸದೆ ಹಿಮಾಲಯದ ತುದಿಯ ತಲುಪುವ ಗುರಿಯಿಟ್ಟು ಸಾಗುತ್ತಿದ್ದ ಹುಟ್ಟು ಕುರುಡನ ಕನಸ ವೇಗದ ಪಾದಗಳ ಹೆಜ್ಜೆಗಳಲ್ಲಿ

ಕವಿತೆ ಹುಟ್ಟಿದ್ದು ಅಲ್ಲಿ ....

ಎದ್ದು ಬಿದ್ದು ಹಿಡಿದ ಪುಸ್ತಕವ ಬಿಡದೆ ರಾತ್ರಿ ಎರಡರ ತನಕ ಓದಿ ಮುಗಿಸಿದ ಮೇಲೆ ಸಿಕ್ಕ ಖುಷಿಯಲ್ಲಿ

ಪ್ರೀತಿ ನೀಡೆಂದು ದೇವರಿಗೆ ಕೈ ಮುಗಿದ ಬಳಿಕ ಸಿಕ್ಕ ನಿಸ್ವಾರ್ಥ ಹೃದಯದ ಬಡಿತದ ಶಬ್ದದಲ್ಲಿ

ತನ್ನ ಆರೋಗ್ಯ ಸರಿ ಇಲ್ಲದೆ ಹೋದರೂ ತನ್ನ ಮಕ್ಕಳು ಹಸಿವೆ ಕಾಣದಿರಲೆಂದು ಕೆಲಸಕ್ಕೆ ಹೋಗಿ ಸಂಬಳದ ಹಣದಲಿ ಕೊಂಡ ಅಕ್ಕಿ ಕಾಳುಗಳಲಿ

ಕವಿತೆ ಹುಟ್ಟಿದ್ದು ಅಲ್ಲಿ....

 ಅಪಘಾತವಾಗಿ ಪ್ರಜ್ಞೆ ತಪ್ಪಿ ಬಿದ್ದಿರುವ ಪೋಷಕರ ನಡುವಿನಲಿ ರಸ್ತೆಯ ನಡುವೆ ಆಟವಾಡುತ್ತ ಕುಳಿತ ಕಂದನ ನಗುವಿನಲಿ

ಚಿಮಿಣಿ ದೀಪದ ಮುಂದೆ ಬಗ್ಗಿ ಕುಳಿತು ಕೂದಲು ಸುಟ್ಟುಕೊಂಡು ರಾತ್ರಿ ಹನ್ನೆರಡರ ವರೆಗೆ ಓದಿ ಶಾಲಾ ಮೊದಲಿಗರ ಪಟ್ಟಿಯಲ್ಲಿ ಹೆಸರು ಕಂಡಲ್ಲಿ

ಕವಿತೆ ಹುಟ್ಟಿದ್ದು ಅಲ್ಲಿ..

ಚಿಂದಿ ಆಯ್ದ ಗೋಣಿಯ ಬೆನ್ನ ಮೇಲೆ ಹೊತ್ತು ತನ್ನಂತಹ ಮಕ್ಕಳು ಸಮವಸ್ತ್ರ ಧರಿಸಿ ಶಾಲೆಗೆ ಹೋಗುವುದನ್ನು ತನ್ನಾಸೆಯ ಕಂಗಳಿಂದ ನೋಡುತ್ತಾ  ನಿಂತ ಕಣ್ಣಿನ ನಕ್ಷತ್ರದ ಮಿಂಚಿನಲಿ

ಕಸದ ತೊಟ್ಟಿಯಲ್ಲಿ ಸಿಕ್ಕಿದ ಎರಡು ಶೂಗಳ ತಂದು ತೊಳೆದು, ಧರಿಸಿ ಸರಿಯಾಗಿದೆ ಎಂದು ಅಮ್ಮನಿಗೆ ಹೇಳುವ, ಆದ ಹಾಕಿ ಸಂತಸ ಪಡುವ ಮುಗ್ಧ ಮಾತುಗಳಲಿ...

@ಹನಿಬಿಂದು@

Honey Bindu HoneyBindu-Tulu Kalpuga 

21.03.2024