ಒಂಚೂರು ತೆಲಿಪುಲೆ -1
ನಮಡ ಮಾತ ಅಂತೆ ಆಂಡಲ ಕಾಸ್ ಉಂಡು. ನಮ ಪೂರ ಬೆನ್ನಿ ಅತ್ತ್ಂಡಲ ಬೇಲೆ ಬೆನ್ಪಿನಕುಲೆ ಅತ್ತೆ! ಬಂಞಲಾ ಬರ್ಪ. ಆಂಡ ನಮ ದುಂಬುದಕ್ಲೆ ಲೆಕ ಫಿರಾಕ್ದ ಕಾಲೊಡು ಜನಮಾನಿ ಪಟ್ಟ್ದ್ ತೆಲಿತೊಂದು ಇತ್ತಿಲೆಕ್ಕ ನಾಲ್ ಜನ ಕುಲ್ಲುದು ಪಾತೆರ್ಯರೆ ಇತ್ತೆ ಪುರ್ಸೊತ್ತು ಇಜ್ಜಿ. ಇತ್ತೆ ಮಾತಾ ಕಡೆಟ್ಲಾ ಟಾರ್ಗೆಟ್. ಆ ಟಾರ್ಗೆಟ್ ರೀಚ್ ಆಯರೆ ಮಾತೆರ್ನಲಾ ಪೊರ್ಂಬಾಟ.
ಇಂಚಿನ ಒಂಜಿ ಟೆನ್ಶನ್ದ ಕಾಲ ಘಟ್ಟಡ್ ಬದ್ಕೊಂದು ಇಪ್ಪುನ ನಮ ಬೊಕ್ಕ ನಮ್ಮ ಜೋಕ್ಲೇನ ಕಷ್ಟದ ಕಾಲಡ್ ಲಾ ಒಂತೆ ತೆಲಿಪರೆ, ತೆಲಿಪಾಯರೆ ನಮಕ್ ಸಾಧ್ಯನಾ ತೂಕ. ಇನಿತ ಇಚಾರ ನಮ್ಮ ಕೈಟ್ ಇಪ್ಪುನ ಮೊಬೈಲ್.
ಮಾತ ಪಪ್ಪ ಅಮ್ಮನಕ್ಲೆಗ್ ಲಾ ಅಕ್ಲೆನ ಜೋಕ್ಲೆನ ಮಿತ್ ಬಾರಿ ನಂಬುಗೆ. ಅಂಚ ಎನ್ನ ಮಗೆ ಮಗಲ್ ಎಡ್ಡೆನೆ ಮಲ್ಪುವೆರ್, ಎಡ್ಡೆನೆ ತೂಪೆರ್ ಪಂಡ್ದ್ ಅಕ್ಲು ಎನ್ನುವೆರ್. ಆಂಡ ಜೋಕುಲು ಕಂಡ್ ಕಂಡ್ದ್ ಮೆಸ್ಸೇಜ್ ಚಾಟ್ ಮಲ್ಪುವೆರ್. ಅಂಚ ಚಾಟ್ ಮಲ್ಪುನ ನಡು ನಡುಟ್ಟು ದಾಲಾ ಕಾಲ್ ಬತ್ತ್ಂಡ ಇಂಗ್ಲಿಷ್, ಹಿಂದಿ, ಮಲಯಾಳಿ, ತಮಿಳ್ ಪೂರಾ ಬಾಸೆಲು ಬರ್ಪ... ಆತೆ ಅತ್ತ್, ಅವು ಕಾಲ್ ಕಂಪೆನಿದ... ಕಾಲ್ ಕಟ್ ಮಲ್ತ್ ಮೆಸೇಜ್ಡ್ ಸರಿಟ್ ನೆರ್ದ್ ಮನಿಪ್ಪಂದೆ ಕುಲ್ಲಾವುನ ಕಷ್ಟ ಅಕ್ಲೆಗ್ ಮಾತ್ರ ಗೊತ್ತು!!!
ಅಂಚನೆ ಕೆಲವು ಅಣ್ಣನಕ್ಲೆಗ್ ಸುಳ್ಳು ಪಂದಾ ದಾನ್ನ ಕೆಲವು ಶೋಕುದ, ಸಪೂರ ಸೊಂಟೊದ , ಬೊಲ್ದು ಚರ್ಮೊದ ಪೊನ್ನುಳೆನ ದೋಸ್ತಿ ಅದಿಪ್ಪುಂಡು. ದೋಸ್ತಿಡ್ ದಾದ ಉಂಡು ಅತೆ! ಇತ್ತೆ ಮಾತೆರೆಗ್ ಮಾತರೆನ ದೋಸ್ತಿ ಇಪ್ಪುಂಡಪ್ಪ. ಐಟ್ ದಾದ ಉಂಡು! ಐಟೇ ಇಪ್ಪುನಿ ಇತ್ತೆ! ಅಲೆನ್ ಅಣ್ಣೆ ಇಲ್ಲಗ್ ಬನ್ನಗ ಮರತೆರ್ಡಲಾ ಆಲ್ ಮರತ್ ಬುಡ್ಡುಜಲ್ . ಭಾರೀ ಮೆಸೇಜ್ಲು. ಅಲೆಗ್ ಒಂತೆ ಕರ್ಚಿಗ್ ಕಾಸ್ ಬೋಡು. ಇಂಚಿನ ಆನುಲ್ಲ ಉಲ್ಲೆರ್ . ಅಕ್ಲೆಗ್ಲಾ ಅಕ್ಲೆನ ದೋಸ್ತಿಲೆನ ಮಿತ್ತ್ ನಂಬಿಕೆ ಬರೋಡು. ಐಕ್ ಆಲ್ ಅಪಗಪಗ ಫೋನ್ ಮಾಲ್ತೊಂದು ಬೇತೆ ಏರೆಡಲ ಇಂಬೆ ಪಾತೆರೊಂದು ಇಜ್ಜೆ ಪಂದ್ ಗೊತ್ತಾಯೆರೆ ಅಪಗಪಗ ಮೆಸೇಜ್ ಬರೊಂದು ಇಪ್ಪುಂಡು. ಅವು ಗೊತ್ತಾಯರೆ ಬಲ್ಲಿ ಪಂದ್ ಮೊಬೈಲ್ದ ಸೌಂಡ್ನ್ ಸೈಲೆಂಟ್ಡ್ ದೀದ್ ಸೈಲೆಂಟ್ ಆದ್ ಮೊಬೈಲ್ ಒತ್ತೊಂದು ಕುಲ್ಲುನ ಈ ಕಾಲಡ್ ಏರ್ ಪೂರ ಏರೆಡ ಮೆಸ್ಸೇಜ್ ಮಲ್ತ್ ದಾದ ಪೂರ ಪಾತೆರೊಂದು ಉಲ್ಲೆರ್ ಪಂದ್ ಏರೆಗ್ ಗ್ಲಾ ಗೊತ್ತಪುಜಿ ಅತೆ!!!
ನನ ಕೆಬಿತ ಒಟ್ಟೆದ ಉಲೈ ತಿಕ್ಕಾವುನ ಬ್ಲೂ ಟೂತ್ ಇಯರ್ ಫೋನುಲು ಬೈದ. ಕೆಲವೈಕ್ ವೈರ್ ಉಂಡು. ಕೆಲವೈಕ್ ವೈರ್ ಇಜ್ಜಿ. ಖಾಲಿ ಕೆಬಿತ ಉಲಾಯಿ ತಿಕ್ಕದ್ ಬುಡ್ಪಿನಿ. ಆಯೆ ಏರೆಡ ದಾದ ಪಾತೆರೊಂದು ಉಲ್ಲೆನಾ, ಏರ್ ಪಾತೆರುನ ಕೇನೊಂದು ಉಲ್ಲೆನ, ಪದ್ಯ ಕೇನುವೆನ, ಕೆಬಿ ಕೇನಂದಿನೈಕ್ ಅವೆನ್ ಕೆಬಿತ ಒಟ್ಟೆದ ಉಲಾಯಿ ತಿಕ್ಕಾವೊಂದೆರಾ ಒಂಜಿಲ ಗೊತ್ತಾಪುಜಿ. ಅವೆನ್ ಪಾಡೊಂದು ಕುಲ್ಲುಂಡ ಏರ್ ಸೈತ್ಂಡಲಾ ಗೊತ್ತಾವಂದ್. ಅಕ್ಲೆನ ಲೋಕೊಡೇ ಅಕುಲು ಗಾಂಜಾ ಪಾಡಿನಕ್ಲೆ ಲೆಕ್ಕ ಒವ್ವಾ ಮೂಡುಡು ಒರಿಯೊರಿಯೇ ಕುಸಿತ ಪಡೆವೊಂದು ತೆಲಿತೊಂದು ಮರ್ಲೆರೆ ಲೆಕ್ಕ ಮಲ್ತೊಂದು ಇಪ್ಪುನೆನ್ ನಿಕ್ಲು ಮಾತ ತೂದಿಪ್ಪರ್, ಮಲ್ತ್ಲಾ ಇಪ್ಪರ್!!
ಮೊಬೈಲ್ ಒತ್ತುನ ಬೇರೊಡು ಬೂರಿ ಜೋಕ್ಲೆಗ್ ಅಪ್ಪೆ ಮೀಪುನ ಬೆಂದ್ರುಡ್ ಬೂರ್ದು ಪ್ರಾಣ ಬುಡುಂಡಲಾ ಗೊತ್ತಾತ್ಜಿ ಪಂಡ ಮೊಬೈಲ್ದ ಮಾಯೆ , ಮರ್ಲ್ ಓಡೆ ಮುಟ್ಟ ಇಪ್ಪು ಎನ್ನ್ಲೆ. ನನಲ ಉಂಡು. ಇನಿಕ್ ಈತ್ ಯಾವು. ದಾಯೆ ಪಂಡ ತುಲು ಟೈಪ್ ಮಲ್ಪೆರೆ ಬಾರಿ ಬಂಞ ಅತೇ? ದಾದ ಪನ್ಪರ್??
@ಹನಿಬಿಂದು@
10.03.2025
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ