ಗುಪ್ತಗಾಮಿನಿ
ಮನದ ಮೂಲೆಯಲೆಲ್ಲೋ ಭೀಕರ ಪ್ರವಾಹ
ಗೀಚಿದ ಕಾದಂಬರಿಯ ಸಹಸ್ರ ಸಾಲುಗಳಂತೆ!
ಗುಪ್ತಗಾಮಿನಿಯಾಗಿ ಹರಿದು ಹೋಗುತಲಿದೆ
ಭಾವನೆಗಳ ಕಡಲಿನ ಆಳದ ದೈತ್ಯ ಅಲೆಗಳಂತೆ
ಅಂದವರು ಇಂದ್ಯಾರೋ ಬದುಕ ಗುಳ್ಳೆಯೊಳಗೆ
ಮುಂದಿನ ಕ್ಷಣಗಳ ಲೆಕ್ಕವಿಟ್ಟವರಿಹರೇ ಇಲ್ಲಿ !
ಸಂದುಗೊಂದಿನ ಮುರುಕು ದಾರಿಯ ಚಲನೆಯಲಿ
ಮೂಕವಾಗಿ ಹಾಡುತಿಹ ಗಾನ ಕೋಗಿಲೆ ಗಂಟಲಲಿ!
ರೈಲು ಬಸ್ಸು ಕಾರು ಸೈಕಲ್ ವಿಮಾನದಲ್ಲಾದರೇನು
ತಲುಪುವ ಕೊನೆಯ ಗಮ್ಯವು ಸರಿಯೇ ಇಲ್ಲದಿರಲು !
ನಾವೆಯಿದು ತುಂಬಿಹುದು ರಾಶಿ ರಾಶಿ ಕಸ ಕಡ್ಡಿಗಳನ್ನ
ಮಾನವತೆಯ ಸವಿ ಭಾವಗಳ ತುಂಬಿಕೊಳದಿರಲು!!
ಮಳೆ ಗಾಳಿ ಚಳಿ ಬಿಸಿಲು ಗುಡುಗು ಏನಿದ್ದರೇನಂತೆ
ತಲೆಯೊಳಗೆ ಒಂದಿಷ್ಟು ನವ ಕನಸುಗಳು ಬೇಕಲ್ಲವೇ?
ಶಿಲೆಯಾದರೂ ಕೆತ್ತಿದ ಸಾವಿರ ಏಟು ತಿಂದು ಬಂದಿಹುದು
ಇಳೆಯೊಳಗಿನ ಸದ್ದು ಗದ್ದಲವಿರದ ಮನಕೆ ಬೆಲೆ ಬೇಡವೆ!
@ಹನಿಬಿಂದು@
11.12.2025
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ