ಸರಕಾರಿ ಪದವಿ ಪೂರ್ವ ಕಾಲೇಜು ಐವರ್ನಾಡು ಇಲ್ಲಿ ಪ್ರೌಢಶಾಲಾ ವಿಭಾಗದ ವಿದ್ಯಾರ್ಥಿಗಳಿಗೆ ಪೋಷಕರ ಸಹಕಾರ ಪಡೆದು ಆನ್ ಲೈನ್ ನಲ್ಲಿ ಬೋಧನೆ ಮಾಡಲಾಗುತ್ತಿದೆ. ವಾಟ್ಸಪ್ ನಲ್ಲಿ ಮೂರೂ ತರಗತಿಗಳ ಮಕ್ಕಳೆಲ್ಲರನ್ನು ತರಗತಿವಾರು ಗುಂಪುಗಳಾಗಿ ಮಾಡಿ, ಪ್ರತಿ ಶಿಕ್ಷಕರೂ ವೇಳಾಪಟ್ಟಿಯಂತೆ ವಿದ್ಯಾರ್ಥಿಗಳಿಗೆ ಶಾಲಾ ಕಾರ್ಯಗಳನ್ನು ಇದುವರೆಗೆ ನೀಡಲಾಗುತ್ತಿತ್ತು . ಆದರೆ ಈಗ ಸರಕಾರದ ಆದೇಶದ ಮೇರೆಗೆ ಎಲ್ಲಾ ವಿದ್ಯಾರ್ಥಿಗಳಿಗೂ ಚಂದನ ಟಿವಿಯ ಕಾರ್ಯಕ್ರಮಗಳ ವೇಳಾಪಟ್ಟಿ ನೀಡಿ, ಅಲ್ಲಿ ನೀಡುವ ವಿಚಾರಗಳನ್ನು ಬರೆದುಕೊಂಡು ಪ್ರತಿನಿತ್ಯ ವಾಟ್ಸಪ್ ಗುಂಪುಗಳಲ್ಲಿ ಬರವಣಿಗೆಯ ಫೋಟೋ ನೋಡಿ ಪ್ರತಿ ವಿಷಯದ ಅಧ್ಯಾಪಕರೂ ತಿದ್ದುವ ಕಾರ್ಯವನ್ನು ಮಾಡುತ್ತಾರೆ.
ಇದನ್ನು ತಿಳಿದ ಪೋಷಕರು ಬಹಳ ಬೇಗನೇ ತಮ್ಮ ಮಕ್ಕಳನ್ನು ಎಂಟನೇ ತರಗತಿಗೆ ಸೇರಿಸಿದ್ದಾರೆ. ಈಗಾಗಲೇ ಇಪ್ಪತ್ತೊಂಬತ್ತು ವಿದ್ಯಾರ್ಥಿಗಳು ಎಂಟನೇ ತರಗತಿಗೂ, ಉತ್ತೀರ್ಣರಾದವರನ್ನೂ ಸೇರಿಸಿ ಮೂವತ್ತು ವಿದ್ಯಾರ್ಥಿಗಳು ಒಂಭತ್ತನೇ ತರಗತಿಯಲ್ಲೂ ಕಲಿಯುತ್ತಿರುವರು. ಶಿಕ್ಷಕರ ಈ ಕಾರ್ಯಕ್ಕೆ ಎಲ್ಲ ಪೋಷಕರೂ ಬೆಂಬಲ ಕೊಡುತ್ತಿರುವರು. ಹಿರಿಯರ ಮಾರ್ಗದರ್ಶನದೊಂದಿಗೇ ವಿದ್ಯಾರ್ಥಿಗಳು ಮೊಬೈಲ್ ಬಳಸುವಂತೆ ತಿಳಿ ಹೇಳಲಾಗಿದೆ.
ಹಿರಿಯ ಶಿಕ್ಷಕರಾದ ಶ್ರೀ ಸೂಫಿ ಪೆರಾಜೆ ಅವರು ಪ್ರತಿ ಪ್ರಾಂತ್ಯಗಳ ವಿದ್ಯಾರ್ಥಿಗಳನ್ನು ಪ್ರಾಂತ್ಯವಾರು ಶಾಲೆಯಲ್ಲಿರುವ ಸರ್ವ ಶಿಕ್ಷಕರಿಗೂ ಸಮನಾಗಿ ಗುಂಪುಗಳನ್ನು ಮಾಡಿ ಹಂಚಿದ್ದಾರೆ. ಆಯಾ ಪ್ರಾಂತ್ಯದ ಎಲ್ಲಾ ವಿದ್ಯಾರ್ಥಿಗಳ ಕಲಿಕಾ ಜವಾಬ್ದಾರಿ ಸಂಬಂಧ ಪಟ್ಟ ಶಿಕ್ಷಕರದ್ದಾಗಿರುತ್ತದೆ. ಪ್ರತಿ ಶಿಕ್ಷಕರೂ ಫೋನ್ ಮುಖಾಂತರ ಸರ್ವ ವಿದ್ಯಾರ್ಥಿಗಳನ್ನು ವೈಯಕ್ತಿಕವಾಗಿ ವಿಚಾರಿಸಿಕೊಳ್ಳುತ್ತಿರುವುದು, ಆ ಮೂಲಕ ಕಲಿಕಾ ಕಾರ್ಯ ನಿರಂತರವಾಗಿ ಸಾಗುತ್ತಿರುವುದು ಎಲ್ಲಾ ಪೋಷಕರಿಗೂ ಸಂತಸ ತಂದಿದೆ.
@ಪ್ರೇಮ್@
25.07.2020
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ