1314. ಮಾನವರಾಗೋಣ

ಮಾನವರಾಗೋಣ..

ಎರಡು ಕೋಣೆಗಳ ಇಬ್ಭಾಗಿಸುವ ಗೋಡೆಯಾಗದಿರೋಣ,

ಎರಡು ತುಂಡುಗಳ ಜತೆಗೂಡಿಸುವ ಸೂಜಿಯಾಗೋಣ.//

ಹಾಲು ನೀರುಗಳಂತೆ ಮಿಲನಗೊಂಡ ಸ್ನೇಹಿತರಾಗೋಣ.

ನೀರಲಿ ಕರಗದ ಎಣ್ಣೆಯಂತೆ ಕೋಪಿಸಿ ನಿಲ್ಲದಿರೋಣ!//

ಮನಗಳ ಒಂದೆಡೆ ಜೋಡಿಸಿ ಕಟ್ಟುವ ಇಟ್ಟಿಗೆಯಾಗೋಣ.

ಹೃದಯವ ಒಡೆದು ಕುಟ್ಟಿ ಪುಡಿಮಾಡುವ ಸುತ್ತಿಗೆಯಾಗದಿರೋಣ!//

ಉತ್ತಮ ಆಲೋಚನೆ ಬೆಳೆಸಿಕೊಳ್ಳುವ ಯೋಗಿಗಳಾಗೋಣ.

ಉತ್ತಮ ಕಾರ್ಯವ ಪರರಿಗೆ ತಿಳಿಸುವ ಗುರುಗಳೆ ಆಗೋಣ.//

ತಗ್ಗಿ ಬಗ್ಗಿ ನಡೆಯಲು ಕಲಿಯುವ ವಿದ್ಯಾರ್ಥಿಯಾಗೋಣ.

ಸುಗ್ಗಿಯ ಕಾಲದಿ ಮೈಮನ ಮರೆಯುವ ರೈತನೇ ಆಗೋಣ//

ಊರಿಗೆ ಸಹಾಯ ಹಸ್ತವ ನೀಡುತ ಮುಖಂಡನಾಗೋಣ.

ಸಮಾಜವ ತಿದ್ದುತ, ಸತ್ಯವ ಹೇಳುತ ಕವಿಗಳೇ ಆಗೋಣ.//

ತಪ್ಪನು ತಿಳಿದು ಸರಿಪಡಿಸೆನುತಲಿ ನಾವೂ ಕಲಿಯೋಣ.

ಯೋಗ, ಧ್ಯಾನದಿ ಮೈಮರೆಯುತಲಿ ಆರೋಗ್ಯ ಹೊಂದೋಣ.//

ಪರರಿಗೂ ಕಷ್ಟವು ಇದೆಯೆಂದು ತಿಳಿಯುವ ಹಿತೈಷಿಯಾಗೋಣ 

ಅವರವರಿಗೆ  ಅವರಷ್ಟಕೆ ಬಾಳಲು ನೆಮ್ಮದಿ ನೀಡೋಣ.//

ತಾನೇ ಪ್ರಪಂಚದಿ ಜ್ಞಾನಿಯು ಎನುತ ಬೀಗದೆ ಬಾಳೋಣ.

ಹಲವಾರು ಭಾಷೆಯ ಕಲಿತು ನಾವು ಗೆಳೆಯರೇ ಆಗೋಣ.//

ಮೂಕ ಪ್ರಾಣಿಗೆ ಕರುಣೆಯ ತೋರುತ ಪ್ರಾಜ್ಞರಾಗೋಣ.

ಮಾನವತೆಯನು ಎತ್ತಿ ಹಿಡಿಯುತ ಮಾನವರಾಗೋಣ.//

@ಪ್ರೇಮ್@

12.11.2019