1108. ನೆನೆಯದಿರು

ನೆನೆಯದಿರು(ವಿಡಂಬನೆ)

ದಿನಮನದ ಗೆಳೆತನವ ನೆನೆಯದಿರು ತಮ್ಮಾ..
ಮನೆಮನದ ಕೊಡುಕೊಳ್ಳು  ಮರೆಯಬೇಕು ತಮ್ಮ..

ಇಂದಿನದು ಇಂದಿಗೆ ನಾಳಿನದು ನಾಳೆಗೆ,
ಪರರ ಚಿಂತೆಯದು ನಮಗೇತಕೆ ತಮ್ಮಾ..

ದಿನದಿನವು ಕತ್ತೆಯಂತೆ ನಾವೇ ದುಡಿಯುವುದೇಕೆ,
ಪರರೂ ದುುಡಿಯಲಿ ಎಂದು ಮನೆಯಲೆ ಕೂಡು ತಮ್ಮಾ..

ನಾನೇ ಮುಂದ್ಹೋಗಬೇಕು ಇಂದು,ನಾಳೆ,
ಬದಿಯವನ ದೂಡಿ, ಜಾಡಿಸುತ ಮುಂದೆ ನಡೆಯುತಿರು ತಮ್ಮಾ..

ಬಿದ್ದೋದವ ಹೋಗಲಿ, ಹುಟ್ಟುವನು ಇನ್ನೊಬ್ಬ,
ನನಗ್ಯಾಕೆ ಯೋಚನೆಯು ಎನುತ ಸಾಗು ತಮ್ಮಾ..

ಕಷ್ಟವನು ಮೆಟ್ಟುತಾ, ಸುಖಬರಲಿ ಎನ್ನುತಾ,
ಸಮಯವನು ಒದ್ದು ಮುನ್ನಡೆಯೋ ತಮ್ಮಾ..

ನಾನು ನಾನೇ ಎಲ್ಲ, ನನಗೆ ಯಾರೂ ಇಲ್ಲ,
ಎನುತೆನುತ ಜಗದಲಿ ಮುನ್ನಡೆಯೋ ತಮ್ಮಾ..

ದಿನದಿನವೂ ಹಿಂದೋಡದೆ ಮುಂದೆಯೇ ನೋಡುತಲಿ,
ಕ್ಷಣಕ್ಷಣವು ಬದುಕಿನೊಡನೋಡುತಿರು ತಮ್ಮಾ..
@ಪ್ರೇಮ್@
04.07.2019