ಅವನ ಅಂತರಂಗ

ಅವನ ಅಂತರಂಗ

ಅದೇಕೋ ಬೇಡ ಬೇಡ ಎಂದರೂ

ನೀನೇ ಮನಸ್ಸಿಗೆ ಬಂದು ಕಾಡ್ತೀಯ ಕಣೆ 

ಮುದ್ದು ಮುಖದ ಹೊನ್ನ ನಗೆ ಕನ್ನಡಿಯಲ್ಲಿ

ನನ್ನೇ ನಾ ಕಾಣುವ ಹಾಗೆ..

ಆ ಬಟ್ಟಲು ಕಂಗಳ ಕಾಂತಿಯ

ಮಿಂಚಿನ ಒಳಗೂ ನನ್ನದೇ ಪ್ರತಿರೂಪ ಕಂಡಂತೆ

ಕನಸಲೂ ನೀನೇ ಮನದ ತುಂಬೆಲ್ಲಾ ನೀನೇ

ಅದ್ಯಾವ ಶಿಲ್ಪಿ ಕೆತ್ತಿ ಜೀವ ತುಂಬಿದರು ನಿನಗೆ

ಬರೆದಷ್ಟು ಪದ ಸಿಗದು

ಗೀಚಿದಷ್ಟು ಸಾಲು ಸಣ್ಣದು

ನಿನ್ನ ಅದು ಹೇಗೆ ಹೊಗಳಲಿ ಚೆಲುವೆ

ನನ್ನೊಡಲ ಕಾವ್ಯದೊಲವೆ

ನೀ ಒಮ್ಮೆ ಮನಸಾರೆ ನಕ್ಕರೆ 

ನನ್ನ ಹೃದಯ  ಬಾಯಿಗೆ ಬಂದಂತೆ

ನಿನ್ನ ಕಣ್ಣಿಂದ ಹನಿ ಮುತ್ತುಗಳು ಉದುರಿದರೆ

ನನ್ನ ನಾ ಮರೆತು ಹೋದಂತೆ

ಧರೆಯೊಳಗಿನ ಸುಖ ಸ್ವರ್ಗ ಸಂತೋಷ ನೀನೇ

ಪೊರೆಯೊಳಗಿನ ಹಾವಿನ ತೆರದಿ ಪೊರೆವೆ

ಮನದಾಳದ ಹೊಂಡದಿಂದ ಆಚೆ ತೆಗೆಯದೆ

ಎದೆ ಗುಡಿಯ ಗರ್ಭ ಗುಡಿಯಲ್ಲಿ ಇಟ್ಟು ಪೂಜಿಸುವೆ

ಮತ್ತೆ ಹಠ ಮಾಡದೇ ಬಾರೆ ಕನಸೇ

ಸತಾಯಿಸದೆ ನನ್ನ ಸೇರೆ ಮುಗಿಲೆ

ನೀರಿನಿಂದ ತೆಗೆದ ಮೀನಂತೆ ಚಡಪಡಿಸುತಿಹೆ

ಮನದ ಕದ ತೆರೆದಿಲ್ಲ ನೀ ಹೊರಗೆ ಓಡುವೆ ಎಂದು

@ಹನಿಬಿಂದು@

04.10.2023