ನವಭಾವ

ನವಭಾವ

ಪುಟ್ಟ ಹಕ್ಕಿ ಹಾರಿ ಹಾರಿ ನೂರು ಭಾವ ಮೂಡಿದೆ

ಎದೆಯ ಒಳಗೆ ಹಿಗ್ಗು ಹಿಗ್ಗಿ ಮನವು ಇಂದು ನಲಿದಿದೆ 

ಬಳ್ಳಿ ಬಳಸಿ ಮರವ ಹಿಡಿದು ಎತ್ತರಕ್ಕೆ ಏರಿದೆ

ಲಿಲ್ಲಿಯಂತೆ ಅರಳಿ ಬಿರಿದ ಸುಮವು ತಾನು ನಗುತಿದೆ

ನೂರು ಆಸೆ ಹೊತ್ತ ಮೋಡ ಹೊಸತು ಹನಿಯ ಚೆಲ್ಲಿದೆ

ಗಗನದಿಂದ ಇಳೆಯ ಸ್ಪರ್ಶಕಾಗಿ ಹನಿಯು ಕಾದಿದೆ

ಖುಷಿಯ ಹಣ್ಣು ರಸವ ತುಂಬಿ ಸವಿಯ ಇಲ್ಲಿ ತುಂಬಿದೆ

ಮಸಿಯ ಮರೆತು ತಳವ ಬಿಟ್ಟ ಪಾತ್ರೆ ಇಂದು ಬೆಳಗಿದೆ

ಪ್ರೇಮದಿಂದ ಮಧುವ ಹೀರೆ ಪಕ್ಷಿ ಕಾದು ಕುಳಿತಿದೆ

ರೋಮ ರೋಮಗಳಲು ಹೊಸತು ನಾದ ಹೊಮ್ಮಿ ಬಂದಿದೆ

ಕಾಮ ಕ್ರೋಧ ಮೋಹ ಲೋಭ ಎಲ್ಲ ತಾನು ಮರೆತಿದೆ

ಮದ ಮಾತ್ಸರ್ಯ ಮರುಕ ಬಿಟ್ಟು ಪ್ರೀತಿಯಿಂದ ತಣಿದಿದೆ

ದೂರ ಸಾಗುತ್ತಿದ್ದ ನಾವೆ ದಡಕೆ ಸನಿಹವಾಗಿದೆ

ಸಾರಿ ಸಾರಿ ಸ್ನೇಹಗಾನ ಮೊಳಗಿ ಕರೆಯ ನೀಡಿದೆ

@ಹನಿಬಿಂದು@

17.02.2025