ಕಥೆ by Diya

ಅಮ್ಮನ ಮಾತು ಯಾಕೆ ಕೇಳ್ಬೇಕು?

ಮಾಲೂರು ಎಂಬುದು ಒಂದು ಚಿಕ್ಕ ಹಳ್ಳಿ. ಅಲ್ಲಿ ಒಂದು ಸುಂದರ ಮನೆಯಲ್ಲಿ ಮಿಂಟು ಎಂಬ ಬೆಕ್ಕು ತನ್ನ ಪುಟ್ಟ ಮಗ ಚಿಂಟು ಜೊತೆ ವಾಸಿಸುತ್ತಿತ್ತು. ಚಿಂಟು ಕಪ್ಪು ಬಿಳಿ ಬಣ್ಣದ, ಚುರುಕು ಕಣ್ಣುಗಳ, ಕುತೂಹಲದಿಂದ ತುಂಬಿದ್ದ ಬೆಕ್ಕುಮರಿ. ಆದರೆ ಅವನಿಗೆ ಒಂದು ಚಿಕ್ಕ ತೊಂದರೆ ಇತ್ತು. ಅದೇ ಅವನು ತುಂಬಾ ಹಠಮಾರಿ! ಅಮ್ಮನ ಮಾತು ಕೇಳುವುದು ಅವನಿಗೆ ಇಷ್ಟವಿರಲಿಲ್ಲ.

ಒಂದು ಬೆಳಗ್ಗೆ ಮಿಂಟು ಅಮ್ಮ ಚಿಂಟುವಿಗೆ ಹೇಳಿತು:
“ಚಿಂಟು, ಮನೆ ಹೊರಗೆ ಹೋಗ್ಬೇಡ, ನದಿ ಪಕ್ಕದಲ್ಲಿ ದೊಡ್ಡ ನಾಯಿಯಿದೆ. ಅದು ಸಣ್ಣ ಬೆಕ್ಕುಮರಿಗಳನ್ನು ಓಡಿಸಿ ಹಿಡಿದು ಸಾಯಿಸಿಬಿಡುತ್ತದೆ!”

ಆದರೆ ಚಿಂಟು ಮುಖದ ಮೇಲೆ ನಗು ತಂದು ಜೋರಾಗಿ ಹೇಳಿದ: "ನನಗೆ ಯಾವುದೂ ಆಗಲ್ಲ ಅಮ್ಮಾ! ನಾನು ವೇಗವಾಗಿ ಓಡಬಹುದು!” ಎಂದು ಕೂಗಿ, ಓಡಿ ಹೋದ.
ಅಮ್ಮ ಎಷ್ಟೋ ಸಲ ಕರೆದರೂ, ಚಿಂಟು ಕೇಳಲಿಲ್ಲ. ಅವನು ನದಿಯತ್ತ ಓಡಿ, ಕಲ್ಲುಗಳ ಮೇಲೆ ಕುಣಿದು, ಜಿಗಿದು ಆಡತೊಡಗಿದ. ಆಕಸ್ಮಿಕವಾಗಿ ಹತ್ತಿರದ ಹುಲ್ಲಿನಲ್ಲಿ ಒಂದು ದೊಡ್ಡ ನಾಯಿ “ಬೌ! ಬೌ!” ಎಂದು ಬೊಗಳಿತು. ಚಿಂಟು ಬೆದರಿದ, ಅವನ ಕಿವಿಗಳು ನಿಂತವು, ಕಾಲುಗಳು ಕಂಪಿಸಿದವು. ಅವನು ಬಹಳ ವೇಗವಾಗಿ ಓಡಿದನು, ತನ್ನ ಪುಟ್ಟ ಪಾದಗಳು ಮಣ್ಣಿನಲ್ಲಿ ಹೂತು, ಮತ್ತೆ ಜಾರಿ ಬಿದ್ದು ಬಿಟ್ಟವು.

ಅಮ್ಮ ಮಿಂಟು ಇದನ್ನು ದೂರದಿಂದ ನೋಡುತ್ತಿದ್ದಳು. ತಕ್ಷಣ ಓಡಿ ಬಂದು ಚಿಂಟುವನ್ನು ತನ್ನ ಬಾಯಲ್ಲಿ ಕಚ್ಚಿಕೊಂಡು ಸುರಕ್ಷಿತವಾಗಿ ಮನೆಗೆ ತಂದಳು. ಚಿಂಟು ಅಮ್ಮನ ಹೊಟ್ಟೆಯ ಮೇಲೆ ನಾಚಿಕೊಂಡು ಬಿದ್ದ. ಮಿಂಟು ಅವನ ತಲೆಯನ್ನು ತಟ್ಟಿ ಮೃದುವಾಗಿ ಹೇಳಿತು: “ನೋಡು ಚಿಂಟು, ನಾನು ನಿನ್ನನ್ನು ಕೇವಲ ಭಯಪಡುವುದಕ್ಕೆ ಮಾತ್ರ ಹೇಳಲ್ಲ. ನಿನ್ನ ಒಳ್ಳೆಯದಕ್ಕೇ ಹೇಳುತ್ತೇನೆ. ಅಮ್ಮನ ಮಾತು ಕೇಳೋದರಲ್ಲಿ ತಪ್ಪೇನಿಲ್ಲ, ಬಾಳು ತುಂಬಾ ಸುಲಭವಾಗುತ್ತದೆ.” ಚಿಂಟು ತಲೆಯಾಟಿ ಹೇಳಿದ: “ಕ್ಷಮಿಸು ಅಮ್ಮಾ. ನಾನು ಮುಂದಿನ ಸಲ ನಿನ್ನ ಮಾತು ಕೇಳ್ತೀನಿ.”

ಆ ದಿನದಿಂದ ಚಿಂಟು ಬದಲಾದ. ಬೆಳಗ್ಗೆ ಎದ್ದೊಡನೆ ಅಮ್ಮನ ಜೊತೆ ಹಾಲು ಕುಡಿದು, ಹಿತವಾಗಿ ಆಡಿ, ಅಮ್ಮ ಹೇಳಿದುದನ್ನೆಲ್ಲಾ ಶ್ರದ್ಧೆಯಿಂದ ಕೇಳುತ್ತಿದ್ದ. ಹಳ್ಳಿಯಲ್ಲೆಲ್ಲಾ “ಚಿಂಟು ಬದಲಾಗಿದ್ದಾನೆ” ಎಂಬ ಸುದ್ದಿ ಹರಡಿತು.
ಮಿಂಟು ಅಮ್ಮನ ಮುಖದಲ್ಲಿ ತೃಪ್ತಿಯ ನಗು ಕಾಣಿಸಿತು. ಚಿಂಟು ಅಮ್ಮನ ಬದಿಯಲ್ಲಿ ಮಲಗಿ ಯೋಚಿಸುತ್ತಿದ್ದ –
“ಅಮ್ಮನ ಮಾತು ಕೇಳೋದು ಎಷ್ಟೋ ಚೆನ್ನಾಗಿದೆ! ಅದು ಪ್ರೀತಿ ತುಂಬಿದ ಮಾರ್ಗದರ್ಶನ.”
ಅಂದು ಸಂಜೆ ಆಕಾಶದ ನಕ್ಷತ್ರಗಳು ಮಿಂಟು ಮತ್ತು ಚಿಂಟುವಿನ ಮನೆಯ ಮೇಲೆ ಮಿನುಗುತ್ತ, ಅವರ ಮಮತೆಯ ಕಥೆ ಹೇಳಿದವು.
ನೀತಿ: ಅಮ್ಮನ ಮಾತು ಯಾವಾಗಲೂ ಪ್ರೀತಿಯಿಂದ ಕೂಡಿರುತ್ತದೆ . ಆದ್ದರಿಂದ ಅದನ್ನು ಕೇಳಿದರೆ ಜೀವನ ಸುರಕ್ಷಿತವಾಗುತ್ತದೆ.
–ದಿಯಾ ಉದಯ್