996. ತುಳು ಬರವು-ಜೋಕುಲು

ಮದಿಮೆದಿಲ್ಲಡ್ ಬಾರೀ ಗೌಜಿಗೆ. ಜೋರು ಜೋರುಡು ಪದ ಕೇನೊಂದಿತ್ತ್ಂಡ್. ಬರಿತ ಎಲ್ಯ ಇಲ್ಲದ ಬಾಬಣ್ಣನ ಮಗಕ್ ಕಣ್ಣ್ ಪೂರ ಔಲೆ. ದಾದ ಪೂರ ಆಪುಂಡು ಪನ್ಪಿನೈಡ್ದ್ ಪಾಯಸದ ವಣಸ್ ಏತ್ ಪೊರ್ತುಗು ತಿಕ್ಕುಂಡು ಪಂದೇ ಕಾತೊಂದಿತ್ತೆ. ಅವ್ವತ್ತಂದೆ ಅಡೆಗ್ ಬತ್ತಿನ ದೂರದ ಬಿನ್ನೆರ್ "ಇಂದಂಬೆ ಚಾಕ್ಲೇಟ್ ತಿನ್"ಪಂದ್ ಕೊರ್ಪಿನ ಪತ್ತೈವ ರೂಪಾಯಿದ ಆಸೆಗ್ ಆ ಆಣ್ ಪ್ರತಾಪ್ ನ ಜೀವ ಒಯಿತೊಂದಿತ್ತಂಡ್ ಅಂಚಿಯೇ. ಅಮ್ಮ ಏತ್ ಪಂಡಲಾ ಕೇನಂದೆ ಗುಡ್ಚಿಲ್ದ ಇಡೆಟ್ ನೂರುದು ಬರಿತ ಮಲ್ಲ ಇಲ್ಲದ ಜಗಲಿದ ಮೂಲೆಡೆ ಪೋದು ಕುಲ್ಲುದಿತ್ತೆ.
  ಬೊಂಬಾಯಿಡ್ದ್ ಬತ್ತಿನ ಕುಟುಮದ ಜೋಕುಲು ಪಾತೆರುನ ಹಿಂದಿ, ಮರಾಠಿ, ಬೆಂಗ್ಳೂರ್ಡ್ದ್ ಬತ್ತಿನ ಜೋಕ್ಲೆನ ಕನ್ನಡ, ಕೇರಳದ ಮಳಯಾಲಂ ಒವುಲಾ ಅರ್ಥ ಆಯಿಜಿಂಡಲಾ ಒಟ್ಟಾದ್ ಗೊಬ್ಬರೆ ಒವುಲಾ ಭಾಷೆ ಬೊರ್ಚತ್ತೇ? ಜೋಕ್ಲೆಗ್ ಆಯೆ ಬಡವೆ, ಇಂಬೆ ಮಲ್ಲಾಯೆ, ಆಯೆ ಬೇತೆ ಜಾತಿದಾಯೆ, ಇಂಬೆ ತಿರ್ತ ಜಾತಿದಾಯೆ ಪನ್ಪಿನ ವಾ ಯೋಚನೆಲಾ ಇಜ್ಜಿ. ಐಕೆ ಅಕುಲು ಪ್ರತಿ ಕ್ಷಣೊನ್ಲಾ ಖುಷಿಟೇ ಕಳೆವೆರ್. ಜೋಕ್ಲೆಗ್ ಗೊಬ್ಯರೆ ಅಕ್ಲೆಲೆಕ್ಕಂದಿ ಜೋಕುಲು ತಿಕ್ಕ್ಂಡ ಆಂಡ್. ಐಕೆ ಜೋಕುಲು ದೇವೆರ್ ಪನ್ಪಿನಿ. ಅಕ್ಲೆನ ಮನಸ್ ದೇವೆರ್ ಲೆಕ್ಕನೆ ಇಪ್ಪುಂಡು. ಐಕೆ ಮಲ್ಲಾಕ್ಲೆಡ್ದ್ ಜೋಕುಲು ಎಡ್ಡೆ ಪನ್ಪೆರ್.
   ಇಂಚ ಬತ್ತಿನ ಗುಡ್ಚಿಲ್ದ ಇಲ್ಲದ ಪ್ರತಾಪ್ ಗ್ ಲಾ ಸಿಟಿತ ಜೋಕ್ಲೆನ ಒಟ್ಟಿಗೆ ಗೊಬ್ಬುನ ಚಾನ್ಸ್ ತಿಕ್ಕ್ಂಡ್. ಅಕ್ಲೆನೊಟ್ಟು ಮೊಬೈಲ್ ದ ಗೊಬ್ಬುಲು, ಟ್ಯಾಬ್, ಮೋಟು-ಪತ್ಲು, ಡೊರೆಮಾನ್ ಪೂರ ಪರಿಚಯ ಆಪೆರ್. ಪೇಂಟೆದ ಜೋಕ್ಲೆಗ್ ಕುಂಟಾಲ್ ದ ಪರ್ಂದ್, ಕುದ್ಕನ ಪರ್ಂದ್, ಚಟ್ಟೆ ಮುಳ್ಳುದ ಪರ್ಂದ್, ತಂಪುದ ಪರ್ಂದ್, ಪೆಜಕ್ಕಯಿ ಪಂಡ ದಾದಂದ್ ಗೊತ್ತಾಂಡ್. ಸುದೆತ್ತ ಬರಿಕ್ ಪೋದು ಮೀಂದುನ ಕಲ್ತೆರ್. ಅಕ್ಲೆಗ್ ಅಕ್ಲೆನ ಶಾಲೆ , ಮ್ಯೂಸಿಕ್ ಕ್ಲಾಸ್, ಸಮ್ಮರ್ ಕ್ಯಾಂಪ್ಡ್ದ್ ಉಂದುವೇ ಖುಷಿ ಆಂಡ್. ಊರುಡು ನನಲಾ ಮಸ್ತ್ ಮದಿಮೆ ಆವಡ್, ಐಕ್ ಪೂರ ಮಲ್ಲಾಕ್ಲು ಎಂಕ್ಲೆನ್ ಊರುಗು ಲೆತೊಂದು ಬರಡ್ ಪಂದ್ ಬಯ್ಯಡ್ ಆಯಿನ ಕೋಲದ ಭೂತೊಡಲಾ, ಪಗೆಲ್ ಡ್ ಆಯಿನ ದೇವೆರೆನ ಪೂಜೆಡ್ ಲಾ, ರಾತ್ರೆದ ಭಜನೆಡ್ ಲಾ, ದೇವೆರೆಡ ನಟ್ಟೊಂಡೆರ್.
  ಅಂಚ ಖುಷಿಟ್ ಕಳೆಯಿನ ಜೋಕ್ಲೆಗ್ ದಿನ ಪೋಯಿನನೇ ಗೊತ್ತಾಯಿಜಿ. ಪಿರ ಪೇಂಟೆದ ಕಡೆಕ್ ತಿರ್ಗ್ದ್ ಪೋನಗ ಅಕ್ಲೆಗ್ ಆಪಿನ ಬೇಜಾರ್ ನ್ ತೂಯಿನ ಹಿರಿಯಕುಲು ಅಕ್ ಲೆಗ್ ಅಜ್ಜನ್, ದೊಡ್ಡನ್ ಬುಡ್ದ್ ಪೋಯರೆ ಮನಸಿಜ್ಜಿ, ಐಕ್ ಬೇಜಾರ್ ಮಲ್ತೊನುವೆರ್ ಪನ್ಪೆರ್! ಅಕ್ಲೆಗ್ ದಾನೆ ಗೊತ್ತು ಜೋಕುಲೆನ ಖುಷಿತ ವಿಷಯ ಗುಡ್ಡೆದ ಕುಂಟಾಲ ಪರ್ಂದ್, ಪೆಜಕ್ಕಯಿ, ಸುದೆತ್ತ ನೀರ್ ಡ್ ಗಂಟೆಗಟ್ಟಲೆ ಮೀಂದುನ ಆ ಸಮಯ, ಗೊಬ್ಬುಲು ಉಂದು ಜೋಕ್ಲೆಗ್ ಮಿಸ್ ಆಪಿನ ಬೇಜಾರ್ ಪಂದ್ ತೂದು ಅಬ್ಸರ್ವ್ ಮಲ್ಪುನಾತ್ ಪುರುಸೊತ್ತು ಮಲ್ಲಕ್ಲೆಗ್ ಓಲುಂಡು ಪನ್ಲೆ?
   ಮಲ್ಲಾಕ್ಲೆಗ್ ಕುಟುಮದಕ್ಲು ತಿಕ್ಕಿನ ಖುಷಿ, ಸೆಲ್ಫಿದ ಗೌಜಿ, ವಾಟ್ಸಪ್, ಫೇಸ್ಬುಕ್ ಡ್ ಅಕ್ಲೆನ ಸ್ಟೇಟಸ್ ಪಾಡ್ ದ್ ಲೈಕ್ ಗೆತೊನ್ನ ಗಮ್ಮತ್, ಅಂಜೆವೆನಕ್ಲೆಗ್ ಮಸ್ತ್ ದಿನಡ್ದ್ ಬೊಕ್ಕ ತಿಕ್ಕಿನ ಫ್ರೀ ಟೈಮುಡು ಬಂಧುಲೆನೊಟ್ಟು ಯೂನಿಫಾರ್ಮ್ ಪಾಡ್ದ್ ಮದಿಮೆಗ್ ಪೋಪಿನ ಖುಷಿ, ರಾಜಕೀಯ, ಲೈಟ್ ಬಿಯರ್ ದ ಪಾರ್ಟಿ, ಕೋರಿದ ಕಟ್ಟದ ಮಜಾ, ಇಲ್ಲಗ್ ಬೋಡಿತ್ತಿನ ಸಾಮಾನ್, ಡೆಕಾರೇಶನ್ ದ ಗಜಿಬಿಜಿ ಗೌಜಿ, ಐತೊಟ್ಟು ರಾತ್ರೆಡ್ ಜೋರು ಪದ ಪಾಡ್ ದ್ ನಲಿಪುನ ಗಮ್ಮತ್ತ್..ಪ್ರಾಯದಕ್ಲೆಗ್ ಅಕ್ಲೆನ ದುಂಬುದ ದಿನ, ಕಷ್ಟೊಲೆನ್ ಪಟ್ಟೊನ್ನ, ತನ್ನ ಪುಲ್ಯರ್ಲೆನ, ಮಗನ, ಮಗಲ್ನ ಬಗ್ಗೆ ಕೊಚ್ಚೊನ್ನ ಕಾರ್ಯ!
ಪೊಂಜೊವುನಕುಲು ಬರಿತಕ್ಲೆನ ಸೀರೆ, ಬಂಗಾರ್, ಬ್ಯಾಗ್, ಮುಟ್ಟು, ಕೆಬಿತ, ಕರಿಮಣಿ, ಚೈನ್ ಪೂರಾ ತೂದು "ಎಂಕ್ ಲೆಗ್ ಲಾ ಅಂಚಿನನೆ ಬೋಡು" ಪಂದ್ ಪಾತೆರೊಂದು ಇತ್ತ್ಂಡ ಜೋಕ್ಲೆನ ಗೌಜಿದ ಲೋಕನೇ ಬೇತೆ. ಐಟ್ ಮತ್ಸರ, ನಂಜಿ ಇಜ್ಜಿ. ಒಟ್ಟಾದ್ ಖುಷಿ ಮಾತ್ರ! ಒರ ಗಲಾಟೆ, ಪೆಟ್ಟ್, ಲಡಾಯಿ ಆಂಡಲಾ ಅವು ಒಂಜಿ ನಿಮಿಷ ಮಾತ್ರ. ಬೊಕ್ಕ ಪೂರ ಒಂಜೇ.
  ಉಂದೆನೇ ಮಲ್ಲಾಕುಲಾಯಿನ ನಮ ಜೋಕ್ಲೆಡ್ದ್ ಕಲ್ಪೊಡಾಯಿನಿ. ಅಪಗ ನಮ್ಮ ಮನಸ್ ಲಾ ವಾ ಟೆನ್ ಶನ್ ಲಾ ದಾಂತೆ ಆರಾಮಡ್ ಇಪ್ಪುಂಡು. ನಿಕುಲು ದಾದ ಪನ್ಪರ್?