ತುಳು ಕಬಿತೆ

ಪಾತೆರ ಕತೆ ಕಬಿತೆ

ಕಲ್ಪುಲ ಮಗ....

ಮಗೆ : ಚೆನ್ನೆಮಣೆ ಗೊಬ್ಬುನೆಂಚ ಪನ್ಲೆ ಎಂಕ್ ಅಮ್ಮ

ಅಪ್ಪೆ: ಐಕ್  ಮನೆಲ ಕಾಯಿಲ ಬೋಡು ಮಗ ನಮ್ಮ

ಮಗೆ: ಅಂಗಡಿಡ್ದ್ ಕಂತ್ ಕೊರ್ಲೆ ಅಮ್ಮ ಎಂಕ್ ಅವೆನ್

ಅಪ್ಪೆ: ಅಂಗಡಿಡ್ ತಿಕ್ಕುನತ್ತ್ ಮರಟ್ ಮಲ್ಪುನವೆನ್

ಮಗೆ: ಮರನ್ ಕನಕ, ನಮಲ ಮಲ್ತ್ ಗೊಬ್ಬುಗತ್ತೆ ಅಮ್ಮ

ಅಪ್ಪೆ: ಗಿಡ ಮರೊನು ಕಡ್ತ್‌ಂಡ ಸಾಪ ಪನ್ಪೆರತ್ತ ತಿಮ್ಮ..

ಮಗೆ: ಅಪಗ ಯಾನ್ ಅವೆನ್ ಇನಿ ಗೊಬ್ಬುನೆಂಚ ದೇವೆರೆ

ಅಪ್ಪೆ: ಅಜ್ಜಿ ಮಲ್ತ್ ಕೊರಿನ ಮನೆ ಅಟ್ಟೊಡಿಪ್ಪು ತೂಕ

ಮಗೆ: ಇತ್ತೆನೆ ಯಾನ್ ಅಟ್ಟ ಮಿತರ್ ನಾಡ್‌ದೊರ ತೂಪೆ

ಅಪ್ಪೆ: ಆವು ಮಗ ಲಲ್ತಕ್ಕನ  ಇಲ್ಲಗೊರ ಪೋಪೆ

ಮಗೆ: ಅಲ್ಪ ದಾದ ಉಂಡು ನಮಕ್ ಇತ್ತೆ ಪೋಪಿ ಲೆಕ್ಕ

ಅಪ್ಪೆ: ಗುಲಗುಂಜಿದ ಮರ ಉಂಡು ಕಾಯಿ ಬೂರ್‌ದಿಪ್ಪು 

ಮಗೆ: ಆವು ಅಪ್ಪೆ ಬೇಗ ಕನಲೆ ಗೊಬ್ಬು ಸುರು ಮಲ್ಪುಗ

ಅಪ್ಪೆ: ಯಾನ್ ಇತ್ತೆ ಪತೊಂದು ಬರ್ಪೆ ನಾಡ್ ದೀಲ ಬೇಗ

ಮಗೆ: ಗೊಬ್ಬರಿನಿ ಪೂರ ಕಲ್ತ್  ಯಾನೆ ಅವೆಟ್ ಗೆಂದೊಡು 

ಅಪ್ಪೆ: ದೇವೆರೆಡ್ಡೆ ಮಲ್ಪಡ್ ಮಗ ಇನಾಮು ನಿಕ್ಕೆ ತಿಕ್ಕಡ್ 

@ಹನಿಬಿಂದು@

17.02.2026

ಗಾಲಿ ಪಟ

ಗಾಲಿ ಪಟ 

ಬಲೆ ಪಿದಾಯಿ ಉಲಯಿಡ್ದ್

ಕನಲೆ ಉದ್ದೊದ ನೂಲುನು

ಬುಡ್ಕ ನಮ ಗಾಲಿ ಪಟೊನು 

ಪತೊನ್ಲೆ ಗಟ್ಟಿ ಪಾರ್ದ್ ತುಂಡಾವು 

ಬನ್ನ ಬನ್ನೊದ ಬಾನೊಡು ರಾಪಿನ

ಬಾನೊಡೆ  ಮಿತ್ತ್ ಮಿತ್ತ್  ಪೋಪಿನ

ಪೋದೊರ ನಮನ್ ಅಲ್ಪಡ್ದ್ ನಿಲ್ಕುನ

ನೂಲುನು ತೂದು ಗಟ್ಟಿಡೆ ಉಂತುನ 

ಜಾಲಿ ಬುಡಿಯೆರೆ ಗಾಲಿ ಪಟ 

ಗಾಲಿ ಬತ್‌ಂಡ ಪೂರ ನಷ್ಟ

ಸಾಲ್ ಸಾಲ್‌ಡ್ ಉಂತ್ಯ ಮೂಲು

ನಾಲ್ ದಿನೊತ ಬಾಲ್ ತೂಲ

ಏತೆ ಮಿತ್ತ್ ಪೋಯಂಡಲ

ತಿರ್ತ್ ಬೂರುವ ಒಂಜಿ ದಿನ

ಮಲ್ಲ ಎಲ್ಯವು ದೇವೆರ್ನ

ಕೂಡ್ದ್ ಬದ್ಕ್ ಗ ಎಡ್ಡೆಡ್ ನಮ

@ಹನಿಬಿಂದು@

03.02.2026

ಕುಕ್ಕು

ಕುಕ್ಕು 

ಸಾದಿಡ್ ಅವರ ಪೋವೊಂದು ಇತ್ತೆ

ಬರಿಟ್ ಇತ್ತಿನ ಮರಡ್ತ್ ಒಂಜಿ ಕುಕ್ಕು 

ಪರ್oದ್ ದ್ ಬೂರ್ದು ಇತ್oಡ್ 

ಬಗ್ ದ್ ಅಂಚಿ ಇಂಚಿ ತೂದು ಪೆಜ್ಜಿಯೆ

ಮೆಲ್ಲ ಕೈಟ್ ಮುದ್ದೆ ಮಲ್ತ್ ದೀಯೆ

ಕಿಸೆಕ್ಕ್ ಪಾಡೆರೆ ಸರಿ ಆಯಿಜಿ

ಅವೆಟ್ ಮಯನ ಉಂಡತೆ

ಅಂಚ ಕೈಟೆ ಪತೊಂದು ಮಂಪೋಯೆ

ಇಲ್ಲದ ತಡಮೆ ದಾಂಟ್ ನಗನೆ ಜೋಕ್ಲೆನ

ಬೊಬ್ಬೆ ಸುರು ಆಂಡ್ ತೂಲೆ

ಪಪ್ಪ ಇಲ್ಲಗ್ ಬತ್ತೆರ್ ಪನ್ಪಿನ ಕುಸಿತ

ಆಂಡ ಯಾನ್ ಪೋದು ಮೀದ್ 

ಉಂಡುದು ಜೆಪ್ಪುನಿ ಮೊಬೈಲ್ ತೂಪಿನಿ

ಜೋಕ್ಲೆಗ್ ಟೈಮ್ ಕೊರಿಯರ 

ನಮಕ್  ಪುರ್ಸೊತ್ತು ಓಲಂಡು

ಅಕಲೆಗ್ ದಾಲ ಬೇಲೆ ಇಜ್ಜೆ ತೂಲೆ

ಕಾಂಡೆದ್ ಬಯ್ಯ ಮುಟ್ಟ ಗೊಬ್ಬು ಒಂಜೇ

ಕೈಟ್ ಕುಕ್ಕು ತೂದು ಪಾರ್ ಬತ್ತೆರ್

ಇಲ್ಲದಲೆಡ ಕೊರಿಯ ಮೆಲ್ಲ ಪೋದು

ಜೋಕ್ಲೆಗ್ ರಡ್ ಮಿಠಾಯಿ ಕೊರುದು

ಆಲ್ ಉಪ್ಪುಂಚೆ ಮಲ್ತ್ ದೀಯಲ್

ಪೂರೆರೆಗ್ಲ ಸೋಕುಡೆ ಗಂಜಿ ಸೇರ್oಡ್ 

ಜೋಕುಲು ಕೈನ್ ಎದ್ ರ್ ಪಿರ ಪೂರಾ ನಕ್ಕೊಂಡ

ಒಂಜಿ ಕುಕ್ಕುಡುಲಾ ಮಾತೆರೆಗ್ಲಾ ಆಂಡ್ 

ಉಂದುವೇ ಕುಕ್ಕುದ ರುಚಿತ ಪವರ್

@ಹನಿಬಿಂದು@

13.05.2024

ಎಡ್ಡೆಪು

ಎಡ್ಡೆಪು

ಸಜ್ಜಿಗೆ ಬಜಿಲ್ ಲ ಬೊರ್ಚಿಗೆ ಅಜ್ಜೆರೆಗಗ್ಯರೆ ಕೂಲಿಜ್ಜಿಗೆ

ಬಜ್ಜಿದ ಒಟ್ಟಿಗೆ ಮಜ್ಜಿಗೆ ಪಾಡಿನ ಬಜಿಲವು  ರುಚಿ ಭಾರಿಗೆ!

ಕಜ್ಜಾಯ ದೀಂಡಲ ನಂಜಿದ ಮನಸ್ ಡ್

ತಿಂದ್ಂಡ ಉಡಲ್ ಗ್ ಸೇರಂದ್ ಗೆ

ಲಜ್ಜೆ ದಾಂತಿನ ಪಜ್ಜಿ ಉಸುರುಲೆನ್

ಮೆಚ್ಚಾಯರೆಗ್ ಏರೆಗ್ಲಾ ಆವಂದ್ ಗೆ!

ಮಂಜು ಬೂರುನ ಪನಿತಾತ್ ಮೋಕೆಗ್ ಲಾ

ಮೂಜಗ ಕಾಪುಂಡು ಕಾತರಡ್!

ಗಂಜಿದ ಬಟ್ಟಲ್ ಡಿತ್ತಿನ ನೀರ್ ಲ ಬಂಜರ ಮಲ್ಪುಂಡು  ಬಡವುನು ಒರಕ್

ಮೂಜಿ ಕಾಸ್ ಬೆಲೆ ದಾಂತಿನ ಬದ್ ಕ್ ಗ್

ಆಜಿ ಮೂಜೈತ ಲೆಕ್ಕಾಚಾರ!

ನಾಚಿಕೆ ಮರತ್ ದ್ ಕಲ್ಪುನ ತೂಲೆ

ಕಲಿಯುಗ ಉಂದು ಪೊಸತ್ ನ್ ಕಲ್ಪುಲೆ..

ಪೂಜಿದ್ ನಿಂಗುನ ಗುಣ ಅವ್ ಪೋವಡ್

ಪಟ್ಟೊಂದು ಬದುಕುನ ಮನಸ್ ಬರಡ್

ಪರತ್ ಲ ಪೊಸತ್ ಲ ಒಟ್ಟಿಗೆ ಸೇರ್ ದ್

ಪೊಸ ಪೊಸ ಆವಿಷ್ಕಾರೊಲು ಆವಡ್..

ಪುರ್ಪದ ಪುರಾಲ್ ದ ಲೆಕ್ಕೊನೆ ನಮ್ಮ

ಪುದರ್ ಲ ಪೋವಡ್ ಪರವೂರುದಂಚಿ

ಪರಬೆರೆ ಬಾಯಿಡ್ ಆಶೀರ್ವಾದದ ವರ ಬರಡ್

ನನೊರಿ ತೂಯೆಡ ಖುಷಿ ಕೊರಡ್

ನನೊರ ಬನ್ನಗ ಶಾಂತಿಲ ಬರಡ್

ಮೋಕೆದ ಉಡಲ್ ಡ್ ನೆಮ್ಮದಿ ಒರಿಯಡ್ .

@ಪ್ರೇಮ್@

02.08.2020