ನೆನಪಿರಲಿ

ನೆನಪಿರಲಿ

ಒಂಭತ್ತು ತಿಂಗಳು ಹೊತ್ತ ಮುತ್ತಿನಂಥ  ಹೆತ್ತಬ್ಬೆಯ

ಕಷ್ಟ ಪಟ್ಟು ಇಷ್ಟದಿ ಸಾಕಿದ ಅಷ್ಟ ಲಕ್ಷ್ಮಿಯಂಥ ತಾಯಿಯ

ಕೋಪ ತಾಪಗಳಿದ್ದರೂ ಪಾಪುವನು ತೊರೆಯದಿಹ ಮಾತೆಯ

ತಾಳ್ಮೆಯ ರೂಪದಿ ಜಾಣ್ಮೆಯ ಕಲಿಸಿದ ನೆಲ್ಮೆಯ ದೇವಿಯ

ನೆನಪಿರಲೆಂದೂ ಕನಸು ನನಸಲೂ ಮನದಿ ನಿರಂತರ..

ಮುದ್ದಿನ ಗುದ್ದಿನ ಜೊತೆಯಲಿ ಮದ್ದಿನ ಬುದ್ಧಿಯ ಕಲಿಸಿದ ಮೊದಲ ಗುರುವಿನ

ದ್ರವ್ಯವನಿತ್ತು ಕಾವ್ಯವ ಕಟ್ಟಿ ಭವ್ಯ ಬಾಳನು ರೂಪಿಸಿದವ್ವನ

ಮಂಜಿನ ಹನಿಯಲು, ಪಂಜಿನ ಬೆಳಕಲು, ಗಂಜಿಯ ಕುಡಿಯುತ, ಅಂಜದೆ ಸಾಕಿದ ಮಾತೆಯ

ನೆನಪಿರಲೆಂದೂ ಕನಸು ನನಸಲೂ ಮನದಿ ನಿರಂತರ..

ನಿರಂತರ ತನ್ನೊಲವನು ಹರಿಸಿದ ತನ್ನವಳ

ಹಿತವನೇ ಕೊರುವ ಕತೆಯಂತಿರುವವಳ

ಪಥದಲೆಂದೂ ಮುಳ್ಳ ತೆಗೆದು ನಡೆಸುವವಳ

ತನ್ನೆದೆಯ ಅಮೃತವಿತ್ತು ಹಾಲುಣಿಸಿದವಳ

ನೆನಪಿರಲೆಂದೂ ಕನಸು ನನಸಲೂ ಮನದಿ ನಿರಂತರ..

ತನ್ನದೆಲ್ಲವ ನೋವ ನುಂಗಿ ಕಾವ ಕೊಟ್ಟವಳ

ಹಸಿವ ಮರೆತು ಬಸವಳಿದು ಹೋದರೂ ಪೊರೆದವಳ

ಕಸವ ಗುಡಿಸಿ ಪರರ ಬಟ್ಟೆಯೊಗೆದು ಸಾಕಿ ಸಲಹಿದವಳ

ಮುಸುರೆ ತಿಕ್ಕಿ ಮಣ್ಣು ಹೊತ್ತು ಕಲ್ಲ ಕಡಿದು ನೋಡಿಕೊಂಡವಳ

ನೆನಪಿರಲೆಂದೂ ಕನಸು ನನಸಲೂ ಮನದಿ ನಿರಂತರ..

@ಪ್ರೇಮ್@

29.11.2020